Robert Romawia'n PMJVK chungchang Minority Affairs minister Irani a sawipui

District Council & Minority Affairs (DCMA) minister Robert Romawia Royte chuan April 6, Ningani khan Union Minority Affairs minister Zubin Irani chu a pisaah a kâwm a, Pradhan Mantri Jan Vikas Karyakram (PMJVK) chungchang a sawipui.

Robert Romawia Royte chuan, PMJVK kaihhruaina siamṭhaa Mizoram pum a tuam thei tawh tur chu lawmawm a tih thu a hrilh a; hun rei tak Mizoram district pariatte'n PMJVK hamṭhatna an dawn theih loh avangin Mizoram sorkarin project a siamte chu ngai pawimawh turin Union Minister a ngen.

Kum kal taa PMJVK sanction thar a awm lo chu pawi a tih thu sawiin DCMA Minister chuan, "India ram state dangte ang thoin Mizoram tan pawh hrilhhaithlak tak a ni. Mizoramin sum dawn sa tluang taka a hman theih avang leh a taka project thawh zawh chin a sàn avangin a bika ngaihtuah a phû a ni," a ti.

Robert Romawia Royte chuan, Mizoram sorkarin PMJVK ṭha taka a kalpui thu leh second instalment pek vat a mamawh thu a sawi a; sum hmuh tirh lamah Covid-19 avangin hna ṭan muan deuh ni mah se, tunah chuan hna a kaltluang a, project tam tak zawh tawh a ni a, zawh mai tur tam tak a awm thu a sawi bawk.

DCMA Minister hian district council area tan a bika project an siam thu sawiin, sum pek vat a nih theih nan ṭanpui turin Minority Affairs minister Zubin Irani chu a ngen a ni.

Robert Romawia hian April, 2023 zan khan DoNER minister of state BL Verma pawh a chenna inah a kâwm a, Mizorama 6th Schedule area-te tana a bika ruahmanna siam ṭul a tih thu sawiin, rawtna a neihte a sawipui a ni.