Pangang khawi aṭangin Rs 4,45,750 hmu

Sorkar kum liam ta 2022-23 chhung khan Khawzawl district-ah Sericulture department hmalaknain chhungkaw 83-in pangang an kháwi a, pangang an khàwi aṭang hian Rs 4,45,750 an hmu.

Khawzawl district sericulture officer (DSO) Hmingthantluangi hnen aṭanga thu dawn danin, an district chhunga pangang khawitu chhungkaw 83-te'n Mulberry cocoon kg. 1,605, Muga cocoon kg. 6,006, Eri cocoon kg. 7 leh Pupa kg. 28.8 an thar a, an hralhna aṭanga sum an hmuh zawng zawng chu Rs 4,45,750 a ni.

Kut hnathawktute'n pangang khawia eizawnna ngêlnghet an neih theihna tura sorkar laipuia Ministry of Textile-in project a duan, Sustainable Livelihood through Ericulture in East Mizoram under Silk Samagra-2 kalpui turah Khawzawl district hi bul ṭanna atan thlan a ni.

Silk Samagra-2 hnuaiah hian chhungkaw 136 thlan a ni a, pangang chaw tur chìnna hmun buatsaihna tur te, pangang khawina in sakna tur te, pangang khawina atana hmanraw ngaite leh pangang khawina in leh a vel leh hmanruate damdawi hmanga tih thianghlimna turte sorkarin a tumsak ang.

Chhungkaw 136-te hian ram buh ṭín khat hmuna zau vâtin an hâl tawh a, pangang chaw an chíng phawt dawn a, kumin August thla velah pangang an khawi ṭan theih beisei a ni.