Zaithiam KC Runremsangi Padma Shree hlan a ni

Zaithiam KC Runrem­sangi w/o Lalthanmawia, Bawngkawn South chuan April 6, 2023 (Ningani) khan President hnen aṭangin India rama civil mite chawimawina sang Padma Shree a dawng.

April 6 zan khan Rash­trapati Bhavan, New Delhi-ah Padma Shree chawimawina hlanna inkhawm buatsaih a ni a; KC Runremsangi hnenah hian President Droupadi Murmu-i'n chawimawina a hlân. Mizo zingah zai (art) huanga Padma Shree dawng hmasa ber a nia sawi a ni.

KC Runremsangi hi March 1, 1963-ah Keiṭum khuaah a piang a, zaithiam niin, audio album pariat a tichhuak tawh. Art & Culture department-ah dance instructress a ni mek a, zai leh làm lamah a thawh hlâwk avangin Padma Shree dawng tura thlan a nih thu January 25, 2023 khan puan a ni.

Mizo hnam hla leh pipu zaite hi a vahvaihpui nasat thu sawiin KC Runremsangi chuan, "A mawi emaw, mawi lo emaw, ka sa hrim hrim zel. India President ṭhin APJ Abdul Kalam a rawn zin ṭum pawhin seki leh khuang nen chauh ka sa a, min hlutsak ve hle nghe nghe," a ti a; hnam hla leh pipu zai sain Mizoram hmun tam takah a zai tawh bakah, ram páwnah pawh a zin nasa a, North Korea-ah pawh India ram aiawha kalin German rùn zai a lo sa tawh a ni.

KC Runremsangi hian Sangeet Natak Academy Award 2017 pawh a lo dawng tawh a, February 6, 2019 khan hlan a ni a; chawi-mawina dang eng emaw zat a dawng tawh bawk.