Taxation-in chhiah vbc. 1,020.66 hmu; cheng vbc. 120.66-in target an khûm

Taxation department chuan sorkar kum 2022-23 chhung khan chhiah cheng vbc. 1,020.66 an hmu a, sorkarin hmuh tura a bituk (target) chu cheng vbc. 120.66-in an khûm. Hetih lai hian, Taxation department chuan contractor chhiah pe lote a chhui a ni.

Kum 2022-23 chhunga Taxation depart-ment-in chhiah a hmuh tura Mizoram sorkarin a bituk (target) chu cheng vbc. 730 a ni a, kum laklawh laiin target hi cheng vbc. 900-ah tihsan a ni. Chuti chung chuan target chu cheng vbc. 120.66-in an khûm ta tho a ni.

Taxation department-in chhiah a hmuhna hlawm lian ber chu goods and services tax (GST) a ni a, kum 2022-23 chhung khan GST aṭangin cheng vbc. 891.33 an hmu. Chhiah hmuhna lian ber dawttu sales tax/value added tax aṭangin cheng vbc. 113.61 an hmu bawk.

Sorkar kum 2022-23 chhunga Taxation department-in chhiah a hmuh zat tur bituk chu budget revised estimate (RE)-ah tihsan a ni a; target tihsan ni mahse an khûm theih tho an inbeisei thu commissioner of state tax Kailiana Ralte chuan a lo sawi tawh a ni.

Kailiana Ralte chuan Vanglaini palai zawhna chhángin, kum 2022-23 chhunga an target chu an khûm theih an beisei thu sawiin, "Revised estimate-ah cheng vbc. 900-ah tihsan a ni. Theihtawp kan chhuah zel ang a, kan target hi kan khûm theih tho kan inbeisei," a ti.

Contractor-te'n chhiah an pek tur an pek ngei theih nan hma an lâk thu sawiin Kailiana Ralte chuan, "Investigation Cell kan din a, chhiah an pek tur ang pe lo contractor-te chhui chian mek a ni," a ti a, hmuh chhuah tawh ṭhenkhatte chu bawhzui turin Taxation zone-te an hriattir thu a sawi.

Commissioner of State Tax sawi danin, contractor-te'n hna an thawhna tur sum ruahman (estimate) aṭanga chhûta 12% chu chhiahah an pe tur a ni. Bill an lâk dawnin 2% lâk ṭhen phawt a ni a, 10% chu bill an lak hnuah anmahni'n an pe tur a ni thung. Contractor eng emaw zat chuan 10% an pe lo a, chu'ng mite chu chhui a ni.