Sorkar kar nan N Vanlaiphaia MNF-te'n an nihna bànsanin seal an thehlut kim
North Vanlaiphaiah BAO dah let tura sorkar karna atan N Vanlaiphaia MNF unit pasarih zinga seal la thehlut ve lo MNF pahnih chuan nimin khan MNF, Hrangturzo East Block-ah an seal-te an thehlut ve leh a; heti hian N Vanlaiphaia MNF unit zawng zawngin an nihna bànsanin seal an thehlut kim.
N Vanlaiphai khua hian an khua aṭanga East Lungdar khuaa Block Agriculture Officer (BAO) sawn chhuah tawh chu N Vanlaiphaia dah lêt turin sorkar an phût a; sorkar nawrna atan N Vanlaiphai Joint Action Committee kaihhruainaa a hma lama an lungrual tawhna leh ruahman angin N Vanlaiphai khuaa MNF unit zawng zawngte chu an seal-te March 28, 2023-ah Mizo Hnam Rûn, Aizawlah thehlut tura tih an ni a; unit panga - Venglai, Bangla Veng, Rahsi Veng, Forest Veng leh Rawlkhang unit hruaitute'n an seal-te an thehlut a ni.
MNF unit pahnih erawh chuan an seal-te March 28 khan an thehlut lo ve lo a, mahse, April 6, Ningani zing dar 7:30 khan MNF party-a hruaitu an nihna bànsanin MNF, Hrangturzo East Block Treasurer hnenah an seal-te an thehlut ve leh ta a ni.
N Vanlaiphai JAC chuan, "Khawtlang hmangaihna avanga an nihna hlu tak pawh ui loa bànsantu hruaitu kan nei hi ropui kan tiin, kan chhuang tak zet. Khawtlang inlungrualna kawngah hma lam pana kan kal zel hi lawmawm a ti tak zet a ni," an ti.
Mizoram sorkarin N Vanlaiphaia Block Agriculture Officer pisa thar a sak chu kum 2022 tìr lam khan BAO leh thawktu dangte'n an luah lut a, January 30, 2023 khan BAO chu East Lungdara sawnna thupek tihchhuah leh a ni.
BAO dah lêt tura sorkar nawrna atan N Vanlaiphai JAC chuan Chief Minister hnenah March 8, 2023 khan lehkha an thehlut a, March 17, 2023 ral hmaa tihlawhtling turin an phût. An thil phût tihhlawhtlin a nih loh avangin February 21, 2023 khan an khuaah kawng an zawh bakah, BAO sawnna thupek copy an hâl a; March 28 khan total bandh an huaihawt leh a ni. N Vanlaiphai VC-a MNF member-te pawhin MNF member an nihna aṭanga bànna DLAO hnenah an thehlut tawh bawk.