KHAWTHLIR

Easter Sunday

Naktuk Pathianni hi Isua Krista kraws-a khenbeh a nih hnua a thawh lehna ni, Easter Sunday a ni a, kohhran hrang hrangin an lawm dawn. Easter Sunday-ah hian kohhran tam tak chuan zing ni chhuah hlimah Isua thawh lehna làwmin Easter Sunrise Service an hmang dawn a, Salvation Army corps hrang hranga band-te'n Isua thawh leh thu tawtawrawt hàmin an puang dawn a ni.

Thisen pe

April 6, Ningani khan Lawngtlai College NSS chuan an college-ah thisen pek an huaihawt a, Lawngtlai District Hospital-ah thisen unit 48 an pe a, petute mipa 45 leh hmeichhia pathum an ni. LIKBK Ṭhalai Pawl hmunpui ruahman angin South Lungpher Bial, Bualpui Ng Bial leh Vawmbûk bialte pawhin South Lungpher kohhran hall-ah Siaha District Hospital tan thisen unit 37 an pe a, petute mipa 31 leh hmeichhia paruk an ni.

MSU Cup 2023

Mizo Students’ Union General Headquarters chuan April 6, Ningani aṭang khan Lammualah MSU Cup Inter College Annual Competition 2023 an ṭan a, Mizoram Football Association honorary secretary Lalnghinglova Hmar-in a hawng. MSU Cup-ah hian college hrang hrangte chu football (mipa), basketball (mipa) leh volleyball (mipa leh hmeichhia)-ah an inel dawn a; April 11 aṭangin hnam làm hmangin intihsiak neih a ni bawk ang.

Current-in man hlum

Micky Lalthansanga Phillips (42) w/o Lalmuanpuii Sailo, Chaltlang chu nimin zing khan Ramrikawnah electric current-in a man a, a hliam tuar loin a thi. Mickey Lalthansanga hi a nupuite in lama an awm laiin, nimin zing khan tukṭhuan ei dawnah a awmna an hre lo a, a chhungte'n phone-a biak an tum aṭangin in chungah a awm tih hriat a ni a, electric current-in a man tih hmuh a ni. An hmuh hian nikhua a hre tawh lo a, damdawi-in panpui ni mah se, chhan theih a ni lo.