MLA-in ran talhna hmun a enfiah

Aizawl South-II bialtu MLA Lalchhuanthanga chuan April 6, Ningani khan a bial chhung, Mualpuia Rural Animal Slaughter House a tlawh a, a enkawltu AH&Vety department hotute nen an inkâwm.

ZPM thuchhuah tarlan danin, Slaughter House chu tunlaiin a chhehvela chêngte tan a thlì leh a rim chungchangah sawiselna a awm a; thli paihna mumal taka siam a ngaih bakah, effluent treatment plant leh separation tanky siam zawh hlim a pût (leak) avangin hman hleih theih lohin a awm a ni.

Lalchhuanthanga chuan, Slaughter House chu sorkarin ngaihven rang se a duh thu te, a chhehvela khawsate leh a chhawrtute'n harsatna an tawh mek chu enfel thuai a, fûr hma ngeia a tlabal lai apiang thawm ṭhat thuai ni se a duh thu a sawi. Thawktu veterinary officer post pahnih awmah mi pakhat chiah a awm avangin, hnawhkhah thuai a ṭul thu a sawi bawk.

Slaughter House-ah hian thla khatah ran 500-600 vel talh reng ang a ni a, Zirtawpni bikah ran 70-80 vel talh ziah ang a nih thu tarlan a ni.