Minister-in jubilee lawmna a hmanpui

Minister K Lalrinliana chuan April 6, Ningani khan Kolasib Auto Rickshaw Drivers’ Union (KARDU)-in Kolasib Diakkawn YMA Hall-a an kum 25-na, silver jubilee an lawmna a hmanpui a, "Hlawhtlinna hmu tur chuan eng hna pawh thawk ila, rinawmna nena kalpui a pawimawh," a ti.

K Lalrinliana chuan, KARDU member-te eizawnna chu mipui thleng pha a nih angin mi dang tana malsawnna thlentu ni zel turin a chah a, "Hlawhtlinna hmu tur chuan eng hna pawh thawk ila, rinawmna nena kalpui a pawimawh. Lirthei khalhtute rinawmna avangin ram leh hnam anga fak leh chawimawina a awm fo," a ti a, intodelhna tluantling awm tur chuan thiamthil chhawr tlâk zir chhuah leh kut hnathawh chàwisàn a ṭul thu a sawi.

KARDU-ah hian member 289 an awm mek a, silver jubilee lawmna inkhawm hi an president Ramfangzauva Ralte-in a kaihruai a, district bawrhsap John LT Sanga pawhin thu a sawi a ni.