Randeep Batta-a'n CHA-ah thisen pe

A thlâwna thisen pek lama nasa taka inhmang Randeep Batta, Chandigarh chuan nimin khan Civil Hospital, Aizawl Blood Bank-ah thisen a pe a, thisen a pek vawi 152-na a ni. Randeep Batta hian state hrang hrangah kalin thisen a pe ṭhin a, Aizawlah pawh thisen pe turin a rawn zin vang vang a, nimin khan a rawn thleng a ni.

Nimin kha sorkar chawlh ni, Good Friday ni mahse Civil Hospital Blood Bank head of departmenrt Dr K Rothangpuia'n a ṭul angin ruahmanna a siam a, thisen a pe thei ta a ni. Randeep Batta hian vawiinah Aizawl a chhuahsan leh nghal dawn a, a kal hmain Association for Voluntary Blood Donation, Mizoram hruaitute chuan vawiin hian Synod Hospital-in blood donation camp an neihna hmun tlawhpui an tum a ni.