Chakma laka FIR chhuanlam chi hrang hrang hmanga tihkhawtlai a ni - ZPM

ZPM party chuan, Chakma-te'n Mizote chung­changah social media-a thu dik lo an thehdarh vanga police-a FIR pahnih thehluh chu chhuanlam chi hrang hrang hmanga tihkhaw­tlai a ni a, tun thlengin hmalakna hmuh tur fumfê a la awm lo niin an tarlang.

ZPM tarlan danin, Chak­ma-te'n social media-ah Mizote an timualpho a, khawvel hmaa an hêk avang­in ZPM MLA Dr Van­lalthlana'n April 24, 2020 khan police-ah FIR a thehlut a, chu chu May 4-ah SP hnenah thawn chauh a ni. Nikum­a Lok Sabha in­thlana PRISM candidate, TBC Lalvenchhunga'n Champhaiah FIR a theh­lut ve bawk.

FIR thehluhte chu chhuanlam chi hrang hrang siam kuala tihkhawtlai a ni tih sawiin ZPM chuan, "Vawiin thleng hian hmalakna hmuh tur a la awm fumfê lo hi a tlâwm thlak ngawih ngawih. Kan police-te kut phuar ni lo se, case ṭhenkhat an chhui chhuah zung zung laia case ṭhenkhat tih khaw­tlai a ni hi hriatthiam har tak a ni," an ti a; 'Vibrant Chakma' tiamtu MNF party sorkarna hnuaiah Chakma-te lakah Mizote chu mei khupin an tawlh duai duai zel ta nia an hriat thu an sawi a ni.