Aizawl khawpuia AR hmuna ram neitu mi 10-in sorkarah an hlàn lêt tawh

Aizawla khawpui chhunga Assam Rifles hmuna ram nei mi pahnih chuan tun hnai khan an ram neihna lehkha pawimawh (document) chu sorkarah an thehlut a; heti hian mi 10-in AR hmuna an LSC/house pass-te sorkarah an pe lêt tawh. 

Vanglaini thu dawn danin, Assam Rifles ram chhungah hian mi 61-in ram an nei a; battalion headquarters (Lammual chhehvel)-ah mi 54-in LSC leh house pass neiin, Assam Rifles commandant bangla ram chhungah mi palin an nei a, MacDonald Hill-a AR hmunah mi pathumin an nei bawk.

Mi 10-in an LSC/ house pass sorkarah an thehluh tawh avangin tun dinhmunah chuan Assam Rifles ram chhunga ram pass nei mi 51 an la awm mek.

March 8, 2019-a Council of Minister ṭhutkhawm chuan sipai luah rama dan loa LSC leh house pass pekte chu ṭhiah a lo rêl tawh. Central YMA pawhin sipai chhuahsan tur ram chu mimal kuta a luh remti loin, LSC leh house pass neitute chu sorkarah pe kir turin an lo ngen tawh ṭhin a, kum 2020 khan Gauhati High Court-ah PIL an thehlut a ni.

Hetih lai hian, Land Revenue & Settlement Director chuan March 24, 2023 khan Assam Rifles hmuna ram neitute chu insawifiah turin a hriattir a, insawifiahna atan ni 30 chhung hun a pe.

LRS Director hian Assam Rifles hmuna LSC leh house pass neitute chu The Mizoram Land Revenue Act, 2013 Section 33(2) tlawhchhanin insawifiah turin a hriattir a; The Mizo District Land Revenue Act, 1956 Section 8-na tlawhchhanin mimalin ram neih theih a ni lo tih tarlangin, Revenue officer-te thu dik lo hmanga bum vanga ram neiah a puh a ni.

Land Revenue & Settlement Director chuan, Assam Rifles hmuna ram neih chuan The Mizoram (Restriction on Use of Transferred Land) Act, 2002 a kalh niin a tarlang bawk.

LSC leh house pass neitute chu ram pass an neih dante sawifiah a, an LSC leh house pass-te tihtawp (cancel) a nih loh chhan tur chiang taka tarlang tura hriattir an ni.