ICFAI-in Political Talk buatsaih

ICFAI University, Mizorama Political Science department chuan April 6, 2023 khan an auditorium-ah ICFAI Political Talk 2023 - Political Dissection of Political Parties in Mizoram an buatsaih a, Mizorama political party hrang hrang aiawhte'n thu an sawi. Serchhip bialtu MLA Lalduhoma hnenah Best Legislator Award an hlan bawk.

ICFAI Political Talk 2023 hi DDK, Aizawl assistant news editor Andrew Lalchhandama'n a kaihruai a; Mizorama political party hrang hrangte leh college hrang hranga zirlai sàwm bik leh ICFAI University-a zirtirtute leh zirlaite an tel.

Political party tin aiawhin mi pakhat ṭheuh - Aam Admi Party aṭangin Lalngaihawma, BJP aṭangin Lalremsiami Fanai, Congress party aṭangin president Lalsawta, MNF aṭangin adviser J Malsawmzuala Vanchhawng, ZPM aṭangin PAC member TBC Lalvenchhunga leh, PC party aṭangin president Vanlalruata te'n an sawi.

Party aiawha thu sawitute'n an party kal dan tur leh hmachhawpte an sawi a; chumi hnuah zawhna inang chhantir an nih bakah, a duh apiang tana zawhna zawh hun leh chhanna hun hawn a ni.

ICFAI University, Mizoram hian Best Legislator Award an sem nghal a, Mizoram Legislative Assembly pariatna (2018-2023) chhunga MLA ṭha ber atan Serchhip bialtu MLA Lalduhoma thlangin, ICFAI University registrar Dr David Lallawmzuala'n chawimawina thuchei a hlan a ni.