ZPM pawh kan hriat sa; MNF nen an danglam lo - Ruatkima

MNF adviser Lalruat­kima, minister chuan April 8, Inrinni khan a bial chhung Dawrpui Vengtharah an party-ah mithar a lawmlut a, Congress chu hriat chian tawh an nih thu leh, ZPM pawh hriat sâ MNF aia danglam chuang lo an nih thu a sawi.

Lalruatkima chuan ZPM leh Congress-te chu MNF aia thawk ṭha thei an ni lo tih a chian thu sawiin, "Congress chu kan hre tawh a, ZPM pawh kan hriat sate kha an ni nual hlawm. Tuna an MLA leh AMC councillor-te pawh hi han en ila, MNF nen an danglamna tehchiam a awm lo. Pu Zoramthanga hnuaiah hian Zoramin hma a sawn nasa em em a, chu chu kan hmu mek. Kan hmu zel dawn," a ti.

MNF chu Mizo natio­nalism kengtu nia sawiin MNF Adviser chuan, "Kan hnam, kan ram leh kan sakhua a him zelna tura thawktu kan ni. Kan innghahna thupui chu Pathian leh kan ram tan, tih a ni. A chhe thei ang bera thudik ziak tluak lo leh dawt hmangtein beih kan tâwk ṭhin a, sawiselna leh deuna karah pawh kan Pathian chu kan vuan tlat," a ti a, chhe lailet dera puhna karah pawh Pathian­in a hruai zel niin a sawi.

Lalruatkima chuan hripui, lirnghing, vawk pul hri, ramri buai leh chhan hrang hrang vangin Mizoramin hun harsa tak a tâwk tih sawiin, "Pathian hruaina bakah, Pu Zo­ram­thanga ruahman thiam­na te, NGO leh kohhran thawhhona avangin kan paltlang thei. Chhuanchham awm loin vawiin kan thleng thei a, a lawmawm hle. Tunah chuan hrite a lo ziaawm chho ta a, hmasawnna nasa leh zual he ram tan hian a thleng ngei ang," a ti.

MNF thuchhuah tar­lan danin, MNF Advi­ser hian an party-ah chhung­­kaw pariat aṭangin voter 24 a lawmlut.