Hlim takin Easter Sunday lawm a ni

Nimin Pathianni kha Isua Krista kraws-a khenbeh a nih hnua a thawh lehna ni, Easter Sunday a ni a, kohhran hrang hrangte'n hlim takin an lawm.

Easter Sunday-ah hian kohhran tam tak chuan zing ni chhuah hlimah Isua thawh lehna làwmin Easter Sunrise Service an hmang a; Salvation Army corps hrang hranga band-te chuan Isua thawh leh thu tawtawrawt hàmin an puang.

Kohhran tam takah chuan nimin khan chawhma, chawhnu leh zanahte Pathian biak inkhawm neih a ni a, Presbyterian kohhrante leh Baptist kohhrante chuan an hmunpui aṭanga thupui thlan hmangin Pathian thuchah an ngaithla a ni.

Catholic kohhrante chuan Inrinni zan aṭang khan Isua thawh lehna an hmang a, 'Krista chu êng a ni' tih lantir nan Easter Vigil hmangin, mei thar an la a, sathau khawnvar chhiin biak-inah an inkhawm. Juda-te ni chhiar danah chuan, ni a tlak chiahin ni thar a inṭan a, chu chu Catholic kohhrante chuan hunpui bikah zuiin, Inrinni zan khaw thim aṭangin Isua thawh lehna an lawm ṭan ṭhin.