Zangnadawmna phut a sân avangin Railways-in harsatna an tawk

Mizoram chhunga sorkar laipui project kal lai mek chungchanga harsatna awmte sawi hoa Empowered Committee for Implementation of Central Projects & Prog­rammes ṭhutkhawm­naah Railways chuan mi ṭhenkhatten zangna­dawmna (compensate) an phût san avangin hna kallai mekah harsatna an tâwk tih an tarlang.

Empowered Commi­ttee for Implementation of Centrral Projects & Programmes hi March 21, 2023 khan an chairman, principal secretary Navin Kumar Chauhdhary hoin Secretariat conference hall-ah an ṭhukhawm a, tunhnaiah an meeting minute a chhuak a ni.

Meeting minute-a a lan danin, Railways lamin zangnadawmna phût sang lutuk avanga hna an thawh theih loh thu an tarlang. Hemi chungchangah hian committee chuan 'harsatna thlenna lai Khamrang chu Aizawl hnaih a nih avangin ram man hi Kolasib district chhung hmun dang nen khaikhin theih a ni loa, chuvang chuan Kolasib DC-in Railways hotute hnenah ram hlutna a san bikna tur chhan ziakin lo hriattir se, tih a ni.

Hetihlai hian thuthar thehdarhtute zawhna chhangin Khamrang VC-te chuan, an huan chhungah hetiang harsatna hi a awm lo nia an hriat thu a sawi a, Mualkhang VC ram chhungah erawh Railways-in alignment an thlâk hret avangin ram teh ṭhatleh pariat bawr vel a awm nia sawiin, "Heng ram neitute hian Railways-in zangnadawmna pek an tum ang zat chu an lungawi pui ta lo niin kan hria," an ti.

Vairengte - Sairang inkar fourlane kawngpui siam tura NHIDCL-in package 3 leh 4 huam chhung ram an lâk fel tawhah thing kih phalna (tree cutting permission) an la neih loh chungchang pawh sawiho a ni a, Additional PCCF kaihhruaina hnuaiah NHIDCL-te nen forest land leh forest land ni lote tichiang turin meeting neih ni se, tih a ni.

Forest Land ni lo-ah phalna pek a nih theih dan kawng zawn ni se tih niin, hmala turin Environment & Forest dept., Land Revenue & Settlement dept. leh NHIDCL-te ruat an ni.

Hei bakah hian Aizawl - Tuipang kawng (two laning)-a harsatna awm chungchang te; Chhiahtlang - Serchhip, Selling - Dulte, Keifang - Tuivai, Zorinpui - Longmasu-a Forest Clearance la fel lo chungchang te; mining permission chungchangte leh Lengpui Airport ram chhunga mimal ram awm chungchangte pawh sawiho a ni.