KHAWTHLIR

KTP-in thisen pe

KṬP, Durtlang Pastor Bial chuan April 8, Inrinni khan Durtlang kohhran hall-ah thisen pek an huaihawt a, Synod Hospital tan mi 58-in thisen an pe a, petute mipa 47 leh hmeichhia 11 an ni.

MLA-in lei hawng

Aizawl North-III bialtu MLA C Lalmuanpuia chuan April 8, Inrinni khan a bial chhunga Electric Veng YMA thlànmual thar pannaa lei dawh thar a hawng. C Lalmuanpuia chuan, lei dawhna tura sum ruahman a tam lo chunga khawtlangin ṭha taka an dawh thei chu fakawm a tih thu sawiin, "Tlawmngai pawl, local council leh political party-te ṭanrualna a lawmawm," a ti. Lei dawhna atan UDPA department aṭangin cheng nuai 30 hmuh a ni a, ft. 74-a thui leh ft. 15-a zau a ni.

Heroin man

Serchhipa Excise & Narcotics department-a thawktute chuan April 7, 2023 zan khan Serchhip Chandmari Vengah heroin gram 205.85 leh a neitua puh Lalremmawii (40) leh Lalneihkimi (42) Serchhip ve ve an man. Heroin hi tualchhung rate-ah Rs 3,75,000 chuang man a ni.

IFMIS zir

Mamit College chuan April 8, Inrinni khan an college-ah 'Two Day Professional Development Programme on Integrated Financial Management & Information System (IFMIS) for Government Administrators-in Mamit District' an buatsaih a, a hawngtu Mamit College principal MS Dawngliana Hnamte chuan, IFMIS chu sum leh pai enkawlna kawnga thil thar leh pawimawh tak a nih avangin sorkar department hrang hranga thawkte'n an hman thiam a ngaih thu a sawi. Training hi vawiinah chhunzawm tur a ni.

Biak-in hawng

Lunglei Ramthar Venga Kohhran Thianghlim biak-in 'Davida Bâwkte' chu nimin khan an kohhran executive committee chairperson Lalzirliani (w/o Dr LB Sailo)-in a hawng. Biak-in hi kum 14 chhung an sa a, a sakna atan cheng nuai 735 an séng a ni.