MPYCC-in Zokhawsang leh a chhehvela loneitute harsatna AR-ah an thlen

Mizoram Pradesh Youth Congress Committee (MPYCC) hruaitute chuan an president Dr Lalmalsawma hoin April 8, Inrinni khan Zokhawsang leh a chhehvela loneitute harsatna Assam Rifle hotute hnenah an thlen.

MPYCC tarlan danin, Zokhawsang leh a chhehvel ram - Sedaikawn, Ramṭhazawl, Khuangkhaului, Phivawklui, Lallozawl, Changelzawl, Aharram, Sangabawk leh Bulpui zaua loneitute hian hunrei tak ata Zokhawsang ram chu feh kawng atan an lo hmang tawh ṭhin a ni.

Tunhnaiah Zokhawsang hi Assam Rifle-te'n an awmna tura an cheibawl tâk avangin feh kawng hi hman chhunzawm an phal lo. Loneitu mi eng emaw zatin tunah hian harsatna an tâwk mek a ni.

MPYCC-te hian 23rd Sector AR DIG brig. Girish Upadhya a awm loh avangin 2nd in Command major Amit Yadav hmuin, Zokhawsang leh a chhehvela loneitute harsatna tawh hi an thlen a ni.

Lo hal zawh thlai chi thlak lai, loneitute tana hun pawimawh a nih avangin an ngenna ang hian Assam Rifle thuneitute chuan thla hnih vel chhung chu ruahmanna an lo siam tur thu an hrilh nia tarlangin MPYCC chuan, "Battalion pakhat hmun tur a nih avangin hunrei tak erawh an camp paltlang hi an remti dawn lo," an ti.

MPYCC chuan Mizoram sorkar chu loneituten harsatna an tawh chhunzawm loh nan ruahmanna a rang thei ang bera siam tura ngenin, a ṭul hun apiangah Zemabawk leh Zokhawsang chhehvela loneitute thlavang hi hauhin hma an la zel dawn tih an tarlang.