Apple chingtute co-operative society zirtir

Northeast Initiative Develop-ment Agency (NEIDA) chuan April 8, Inrinni khan Champhai Vengthlang YMA Rûnah NABARD bultum Tribal Development Fund (TDF5) hnuaia Khawbung RD block chhunga apple chingtu, Tuipuiral Apple Growers Co-operative Society Ltd. member-te tan co-operative society inenkawl dan (Co-operative Society Ma-nagement) chungchang an zirtir.

Inzirtirna hi co-operative audit officer C Vanlalhruaia chuan Co-operative Society inrelbawl dan tur leh kut hnathawktute tana apawimawh dan chungchang a sawi a, NABARD district development manager H Lalhma-chhuani'n NABARD hnuaia FPO-te hamṭhatna dawn theih hrang hrang a sawifiah bawk.

Sorkar thuchhuah tarlan danin, NEIDA hian kum 2020 aṭang khan Tata Trusts leh Development Finance Institution hrang hrangte kaltlangin Champhai district-a loneitu leh mirethei zawkte chàwikàn hna an thawk ṭan a; Tata Trusts bultum Integrated Livelihood Promotion (ILP) hnuaiah Khawbung RD block-a khaw paruka loneitu mi 352-te tan vaimim leh chana chìn hna an kalpui. He project-ah hian AH&Vety department nen ṭangkawpin loneitute thar chhuah vaimim quintal 612, cheng nuai 12 man hu an lei sak tawh a ni.

NEIDA hian Champhai leh Khawzawl district-a khaw 41 tan Springshed Management hna an thawk dawn a, he project kaltlang hian tuihna chak tawh lo leh kang chat tawhte tih nun thar leh nan groundwater recharge hna an thawk dawn a ni.

NEIDA leh NABARD thawhhona Farm Sector Promotion Fund (FSPF) hnuaiah hian Ruantlang khuaa loneitute tan zikhlum leh chana chìn hna buaipui a ni a; Tribal Development Fund (TDF6) hnuaia Khawzawl district-a khaw paliah dragon fruit chìn hna kalpui tum niin, NEIDA hian hma an lakna hmunahte hian thlai tui pek tur hnianghnar zawk a awm theih nan Diversion Based Irrigation hmangin tuilakna turte an buaipuisak ṭhin bawk.

Khawbung RD chhunga apple chingtute hi NEIDA leh NABARD ṭanpuinain Central Sector Scheme 10,000 FPO hnuaiah Tuipuiral Apple Growers Co-operative Society Ltd. tia ziahluh an ni.