August 27-ah VC leh LC inthlan Fimkhur taka kalpui kan tum - SEC
Mizoram State Election Commission (SEC) chuan village council (VC) leh local council (LC) inthlan hun atan August 27, 2020 ruat a nih thu nimin khan an puang a, nimin aṭang khan Election Model Code of Conduct hman ṭan nghal a ni. Inthlan ní-ah hian zing dar 7 aṭanga tlai dar 5 thleng vote thlak a ni ang. SEC chuan, inthlan chu fimkhur taka kalpui tum a nih thu an sawi.
VC leh LC inthlan hun tur hi nimin khan ATI Auditorium-ah state election commissioner (SEC) Laima Chozah chuan a puang a, "VC leh LC inthlan hi May 7, 2020 khan tihfel vek tawh tur a ni a, Covid-19 vangin kan ti thei lo. Inthlan hi autonomous district council-in a huam loh zawng district pakuaah buatsaih a ni dawn a, VC 558 leh LC 83-ah inthlan a ni ang," a ti.
Vanglaini palai zawhna chhángin SEC hotute chuan, polling station buaipui ngai bik (critical polling station) leh polling station venhim uluk ngai bik (sensitive polling station) chungchang chu July 31 khan DC leh SP-te nen an sawiho tih an sawi a, "Anni'n ṭul an tihte chu critical leh sensitive polling station atan puan tur a ni," tiin, uluk takin venhimna kalpui a nih tur thu an sawi.
Laima Chozah chuan, Covid-19 léng vangin fimkhur lehzuala inthlan buatsaih a ngaih thu sawiin, "Sorkarin zawm tur hrang hrang a duante zâwm chungin inthlan buatsaih tum a ni. Polling station huam chhungah mi 50 aia tam awm phal a ni dawn lo," a ti.
SEC hotute sawi danin, Election Commission of India thupek angin VC leh LC inthlan tura electoral roll an rin chhan ber tur chu MLA inthlan hnuhnung bera electoral roll a ni. MLA inthlan hnuhnung bera electoral roll-ah hian Tripura-a Bru-te an la chuang a, chuvang chuan VC leh LC inthlan atana electoral roll revision-ah pawh paih mai theih an ni lo.
Tripura-a Bru-te'n an duh chuan VC leh LC inthlanah hian vote an thlak thei a, candidate pawh an ni thei a; mahse, Mizoram sorkarin dan a neih angin ni 14 chhung mahni inséngsoin Mizoramah khung hran phawt tur a ni. Hemi chungchangah hian SEC chuan Mamit DC hnenah hriattirna a pe tawh.
VC 558 inthlan turah hian seat 2,464 a awm a, general seat 1,831 leh hmeichhe tana hauh seat 633 a ni a; LC 83-ah chuan seat 545 awmin, general seat 397 leh hmeichhe seat 148 a ni. VC inthlan turah voter 4,54,180 leh LC-ah 2,18,758 an awm.
VC leh LC inthlan turah hian member pathum leh panga awmnaah hmeichhe seat pakhat, member pasarih awmnaah hmeichhe seat pahnih leh member pakua awmnaah hmeichhe seat pathum hauh a ni. LC-ah chuan member pathum leh pakua awmna a awm lo.
Inthlan hma ní, August 26-ah SEC chuan Mara Autonomous District Council-a Siaha North-I bialah MDC ni lai a thih avangin by-election a buatsaih dawn bawk a; he bialah hian voter 1,627 an awm a ni.
VC/LC inthlan leh a kaihhnawih
• Inthlan puan ní - - August 5, 2020
• Nomination thehluh hun hnuhnung - August 11, 2020
• Nomination endik hun - August 11, 2020
• Inhnuhdawh hun hnuhnung - August 13, 2020
• Symbol siam leh candidate tár chhuah - August 13, 2020
• SEC-a candidate list thehluh hun - August 14, 2020
• Inthlan vote thlak ní - August 27, 2020
• Vote chhiar hun - August 27, 2020
• Inthlan ṭhat ngai a awmin - August 28, 2020
• VC/LC din fel hun hnuhnung - September 4, 2020
• Inthlan kaihhnawih zawh hun - September 7, 2020