SEDP aṭangin mi 1,261 hnenah Sangha khawi ṭanpuina pe tawh

Mizoram sorkar chuan Socio Economic Development Programme (SEDP) hnuaiah chhungkaw 1,261 hnenah sangha khawi ṭanpuina Rs 25,000 ṭheuh a pe tawh a, ṭanpuina sum a pek tawh zat chu Rs 3,15,25,000 a ni.

Fisheries department hnuaia sangha khawi leh sangha dil siam bakah, a kaihhnawih ṭanpuina pek tawh dan Vanglaini-in document a neiha a lan danin, Mizoram sorkar chuan SEDP hnuaiah sangha khawi ṭanpuina Rs 3,15,25,000 a pe chhuak tawh a; district 11-a chhungkaw 1,261 hnenah Rs 25,000 ṭheuh pek a ni. SEDP hnuaiah vêk hian Kolasib-ah Chakai Farm atan cheng nuai 39 sèn a ni tawh.

Sorkar laipui scheme PMMSY hnuaiah sangha khawi kaihhnawih ṭanpuina chhungkaw 14,985 hnenah Rs 16,47,61,200 pek a ni tawh a; RKVY hnuaiah chhungkaw 28 hnenah ṭanpuina Rs 51,20,000 pek tawh a ni.

Blue Revolution scheme hnuaiah chhungkaw 245 leh ZOFISFED hnenah ṭan-puina Rs 3,48,00,000 pek a ni tawh a; India Constitution Article 275(1) hnuaiah Social Welfare department aṭangin chhungkaw 167 hnenah ṭanpuina Rs 1,27,00,000 pek a ni tawh bawk.