DC-in chhuak turin hriattir

Lunglei district bawrhsap Ramdinliani chuan April 8, Inrinni khan National Highway no. 54 zauh tura package 6 chhunga zangnadawmna pek tawh, an in leh lo chhuahsan duh lo mi 56-te chu an ram chhuahsan tura hriattirna, eviction notice a pe.

Lunglei DC hian April 8, Inrinni khan NH-54 (package 6) chhunga hna thawhna hmun a tlawh a, Ṭawipui North-II khuaa mi paruk, Ṭawipui South khuaa mi 18 leh Thingfal khuaa mi 32 hnenah eviction notice a pe a ni. Mi 56-te chu inbuatsaih nan lehkha pek aṭanga ni 15 hun pek a ni a, hun tiam chhunga an chhuak lo a nih chuan tihluihna hmanga chhuahtir tum a ni.