Mizoramah fentanyl a la rawn lut lo; ruihhlo doah ṭanrual a ngai - Excise Minister

Excise & Narcotics minister Lalrinawma chuan nimin khan thuchhuah siamin, tunhnaia Mizorama fentanyl, zombie drugs leh new psycho active substance (NPS)-te lo lut tawh anga thuthang chu thu dik lo a nih thu leh ruihhlo donaah Mizoram mipui ṭanrual a ngaih thu a tarlang.

Lalrinawma chuan, tunhnaia zombie drug, fentanyl leh new psycho active NPS-te Mizorama lo lut tawh nia sawi leh Mizo ṭhalaite zingah hmang sual an awm nia sawi chu Excise & Narcotics department (END) in an zirchian thu a tarlang a, "He thu thang hi a dik lo a ni tih April 6, 2023 khan finfiah nghal a ni," a ti.

Tunhnaia social media-a video clip pakhata mi pahnih lo langte'n fentanyl an rui nia ngaih theih tura sawi awm chu zir chian a nih thu tarlangin, "Anmahni ngei pawh kawm an ni a, anni chuan he damdawi (fentanyl) hi a hming pawh an la hriat ngai loh thu leh a hmuh pawh an la hmuh ngai loh thu an sawi a ni," a ti a, video-a lâk an nih ní hian heroin leh drugs dang chi thum, tualchhunga hmuh mai theih chawhpawlhin an ruih thu a sawi.

END Minister chuan Mizoram mipuite'n ruihhlo dona kawngah mit leh beng an chhi tláng zel chu thil lawmawm tak a nih thu a tarlang a, "Ruihhlo dona kawnga thâ thawhtute thâ tichak a, a ṭulna apianga ṭawiawm zel turin Mizoram mipuite ka chah thar leh a. Chutih rualin, thil a nihna tak hre chiang hmasa loa mipui ti chiai thei zawnga thu thehdarh mai lo a, a zirchiang theitu leh hma la theitute hriattir hmasa zel turin mipuite ka ngen bawk a ni," a ti.