March-ah lirthei dan zawm lo 2,051 man

Aizawl Traffic Police-te chuan March 1-31, 2023 chhung khan Aizawl khawpuiah lirthei dan zâwm lo 2,051 an man a, dan zawm lote pawisa chawi tlingkhawm chu Rs 15,31,300 a tling.

Kumin March thla chhung khan Aizawl khawpuiah Traffic police leh Transport department chuan ni 19 chhung lirtheiin a ken tel thil pawimawhte nei kim lo leh dan zâwm lote endikna, special drive an kalpui a; special drive neih chhung hian Aizawl khawpuiah drive neih hma aiin lirthei a thâwl a, lirthei khu tehna leh lirthei chhiah pekna hmunte erawh a lûn hle thung.

Vanglaini thudawn danin, March 1-31, 2023 chhung khan Aizawl Traffic Police-te chuan lirthei dan zawm lo 2,051 an man a, heng zinga 1,570 (76.54%) chu two wheeler niin a tam ber. Lirthei man zingah hian LMV 369, HMV 60, taxi 39, MMV pasarih leh bus paruk a awm bawk.

Lirthei man zinga tam ber, two wheeler neitute pawisa chawi hi Rs 11,93,200 a ni a, March thla chhunga lirthei dan bawhchhiate pawisa chawi zawng zawng Rs 15,31,300 aṭangin 77.92% a tling.