Covid-19 vei 3 hmuh belh Niminah mi 4 chhuahtir an ni

August 4, Thawh­lehni khan Rapid Antigen Test (RAT) hmangin Aizawl leh Serchhipah Covid-19 vei mi pathum hmuh chhuah a ni a, Zoram medical College (ZMC) leh district danga endikte zingah hripui kai an awm lo. Mizorama Covid-19 kai hmuh tawh chu mi 504 an ni a, nimin khan hripui vei dam tawh mi pali chhuahtir leh an ni.

RAT hmanga Thawhlehnia swab sample endikah hian Aizawl district-ah Covid-19 vei mi pahnih hmuh chhuah an ni a; Assam regiment sipai kum 25 mi, tun hnaia Jammu & Kashmir aṭanga lo haw leh hmeichhia kum 21 mi, Assam aṭanga lo hawte an ni. Sipai hian taksaah harsatna a nei (Covid-19 symptom lang) a, State Referral Hospital (SRH)-ah dah luh a ni a; hmeichhiain symptom a nei lo thung a, Covid Care Centre (CCC) - Lengpuiah dah a ni.

Serchhipah pawh August 4 khan Covid-19 vei mi pakhat hmuh chhuah niin, Assam Regiment sipai kum 37 mi, tun hnaia Assam aṭanga haw a ni a, Covid-19 symptom a nei lo. Rapid Antigen Test hmang hian August 4 khan Aizawl-ah mi 24, Khaw­zawlah 10, Serchhipah 13 leh Lengpui Airport-ah mi pali, an vaiin mi 51 endik a ni a; ZMC laboratory-ah SRH, Aizawl leh Lawngtlai aṭanga dawn sample 34 endik a ni bawk.

Hetih lai hian, Covid-19 vei dam tawh mi pali, mipa vek chhuahtir leh an ni a; Mizorama Covid-19 kai mi 504 zing­a mi 286 (56.75%) chu chhuak tawhin, mi 218 (43.25%) an la chhuak lo.Nimin khan Aizawla Covid Care Centre (CCC), Berawtlang aṭangin Covid-19 vei dam tawh BSF sipai pakhat chu chhuahtir a ni a, CCC dang - Tribal Art Centre, Tanhril aṭangin Assam Rifles leh NDRF mi pakhat ve ve chhuahtir an ni. SRH aṭangin NDRF mi pakhat chhuahtir a ni bawk.

Covid-19 vei vanga enkawl, la chhuahtir loh zingah hripui an vei tawh lo (negative tawh) tih finfiah eng emaw zat an awm. Lawngtlai CCC-a enkawl mek pathum zinga pakhat chuan hripui a vei tawh lo tih finfiah tawh niin, vawiinah chhuahtir tum a ni a, Aizawl leh Lungleiah pawh negative tawh eng emaw zat an awm nia thu dawn a ni.