Sorkar hmalakna muang an tih avangin loneitute'n Assam Rifle hotu an dawr

Zokhawsang leh a chhehvela huan leh lo neitute chuan an feh kawng dan a nih chungchanga sorkar hmalakna muang an tih avangin nimin khan Zokhawsanga Assam Rifle hotu an dawr.

Zemabawk Farmer Society (ZFS) hruaitute hnen aṭanga Vanglaini thudawn danin, Zokhawsang ramah chhungkaw 100 velin ei an zawng a ni. An huan/ loa kal turin Zokhawsanga Assam Rifle hmun an paltlang ṭhin a ngai a, hun eng emaw chen an paltlang thei tawh lo.

March 24, 2023 vel khan Union Home minister Amit Shah lokal dawn avangin March 30 thleng Zokhawsanga AR ram hi paltlang theih a nih dawn loh thu hriattir an ni a, a hnuah April 1, 2023 thleng tih leh a ni. Hei hi thuawih takin an zawm.

April 1 ral hnuah pawh an huan/ loa an kal tur chu Assam Rifle lamin an lo dang zel a, an harsatna tawh hi Chief Minister hnenah pawh an thlen a ni. April 8 zingah khan Chief Minister hnenah April 10, 2023 hma ngeia AR hmun an paltlang theihna tura hmalak sak turin an ngen leh.

Nimin (April 10) khan huan/ lo neitute chu feh turin an kal a, mahse Assam Rifle lamin an lo dang leh a ni. Nimin vêk khan ZFS hruaitute chuan Zokhawsanga AR hotu hnenah lehkha thehlutin, an huan/ lo panna kawng dang siamṭhat a nih hma chuan an hmun kaltlang phal turin an ngen.

ZFS ngenna ang hian AR chuan an ram chhung paltlang an remtihsak rih dawn a, a hun chhung tur erawh hriat theih a la ni lo.

An ngenna chung-changah sorkar hmalakna an duhkhawp loh thu sawiin ZFS hruaitute chuan, "La nghah deuh ngai an tih zel avangin vawiin (nimin) zing dar 7 aṭang khan eng pawh hmachhawn turin kan thawk chhuak a ni. Mahse, buaina em em awm loin AR-te nen kan inbe rem thei," an ti.

ZFS hruaitute chuan Zokhawsanga AR hmun paltlang lo chuan an huan/ lo kal a harsat thu sawiin, "A helna kawng hi a chhe hle a, thlai kan lâk pawhin in kan thlenpui chuan a chhe hman a ni," an ti a, kawng hi siamṭhat a nih hma chuan AR hmun paltlanga feh an duh thu an sawi.