KHAWTHLIR

Book of the Year, 2022

Mizo Academy of Letters (MAL) chuan kum 2022 chhunga Mizo ṭawnga lehkhabu chhuak zinga ṭha ber - 'Book of the Year, 2022' atan Zohmangaihi ziah 'Daidanna Bang Phena Thuruk' tih an thlang.Zohmangaihi hnenah hian Book of The Year lawmman hi April 26, 2023-a MAL dincham lawm a nih hunah Art & Culture minister R Lalzirliana'n a hlan ang. MAL hian kum 2022 chhung khan Mizo ṭawnga lehkhabu chhuak 203 a lakhawm thei a, chung aṭang chuan Book of the Year hi a thlang a ni.

Dept. hotute kawm

Mamit district bawrhsap thar VL Remliana chuan nimin khan DC conference hall-ah Mamit khawpuia sorkar hotute a kawm a, an thawhpuina a mamawh dawn tih a sawi. Ṭhutkhawmah hian Union Minister of State-in Mamit district a rawn tlawh huna lo dawnsawn dan tur an rêl bakah, mawhphurhnate an insem nghal.

Thil zawrh khap

Lunglei Market & Trade Centre thar sak turah Lunglei District Disaster Management Authority chairman Ramdinliani, bawrhsap chuan, "Mipuite kan him tlân zawk nan thu leh awm hma chu Lunglei Market & Trade Centre thar sak mek hung chhungah hnathawktute leh phalna neite bak luh phal a ni lo a, thil zawrh leh bazar phei chu khap tlat a ni," a ti.

Kawng khar dawn

National Highway 306 'A' - Saihapui V pengṭhuam aṭanga Buarchep lei inkar kawng chu PWD in thawmṭhat hna an thawh dawn avangin April 10-15, 2023 chhung helai kawng hi khar a ni dawn a; kawng khar chhung hian Lailapur aṭangin ni tin mamawh phur lirtheite chu tlan tur a ni. Harsatna tâwk emaw, report tur nei emaw chuan Vairengte police station OC phone number 9436151800 / PWD SDO phone number 9701740606-ah biak theih a ni.

DC-in chah

Lunglei bawrhsap Ramdinliani chuan chhiatna thleng chungchanga hriat tur leh tih tur leh tih loh turte hriat theihna National Disaster Alert Portal (sachet.ndma.gov.in) leh CAP based Integrated alert System mobile App (sachet App)-te chu ṭangkai taka hmang turin district mipui a chah. He thil pahnih hi Google Play Store leh Apple App Store-ahte download theih a ni.