Covid-19 vei chhuak tawh Police-in an man nghal

Covid-19 vei, an dam tawh vanga chhuak tawh Myanmar lam mi pahnih chu chhuahtir an nih velah police-in an man nghal a, judicial custody (Central Jail)-ah an awm mek nia thu dawn a ni.

Myanmar lam mi pahnih, mipa ve ve chu Zoram Medi­cal College laboratory-ah Covid-19 an vei tih July 17, 2020-a finfiah a ni a, Champhai Dedicated Covid Health Centre (DCHC)-ah enkawl niin, August 3, 2020 khan DCHC aṭangin chhuahtir an ni.

Myanmar-a Mizo pahnihte hi Champhai DCHC aṭanga chhuahtir an ni veleh dan an bawhchhiat avangin Aizawl police-te'n Champhai aṭangin Aizawlah an la nghal a; Court-ah hruai niin, Court thu angin judi­cial custody-ah an awm mek.

Police hotute hnen aṭanga thu dawn danin, Myanmar mi pahnihte hi Foreigners Act hmangin dan loa India rama lut thubuai leh The Mizoram (Containment and Prevention of COVID-19) Ordinance, 2020 bawhchhiat thubuai siamsak an ni.

Tarlan tawh angin, Myan­mar lam mi, state páwn aṭanga Mizorama lut mi pahnih chu R Dengṭhuama Hall, Salem Vengah an swab sample lâk a ni a, chumi hnuah Champhai lama khung hran (quarantine) turin thawn nghal an ni.

R Dengṭhuama Hall-a swab sample laksak an nih lai velin pakhat zawk chuan hall bul hnaia dawr pakhatah thil a lei nia hriat a ni a, a hnu­ah Covid-19 a vei tih hmuh chhhuah a nih bawk avangin, Salem Veng Local Task Force chuan an vengah curfew an puan phah a ni.