Eirukna tihbona turin ruahmanna fel tak kan siam tawh - Duhoma

ZPM chuan nimin khan an pisa-ah chhung inkhawm an hmang a, ZPM leader Lalduhoma chuan eirukna tihbona turin ruahmanna fel tak an siam tawh thu a sawi.

Lalduhoma chuan sorkarna an chang a nih chuan eirukna tihbo an tum tih sawiin, "Kan ramah hian eirukna kan duh nge duh lo tih kum tawpa inthlan awm turah kan bùk ang. Ram mipuite hian eiru hote hi kan ning. Corruption tihbona turin ruahmanna fel tak kan siam tawh. Kan ngaihhlut zâwng pawh thlâk kan tum," a ti.

Serchhip MLA by-election leh Lunglei Municipal Council inthlanah sum thiltihtheihna khenbeh a nih thu sawiin ZPM Leader chuan, "Hei hian kan ram hawi zawng leh kalphung tur nasa takin a her danglam mek a ni. ZPM hi hnehna changtu kan ni lo," a ti a, hnehtu chu Pathian leh mipuite an nih thu a sawi.

Lalduhoma chuan mipui leh Pathian chaknaah an innghat tih sawiin, "Beiseina kan nei sang hle. MLA inthlan lo awm turah hian kan chak ang em kan hre lo a, inthlan erawh kan nghakhlel hle," a ti.

'Kan thutiam anga kan awm leh lo a nih chuan min chhuahsan leh dawn nia' ti ngam awmchhun an nih thu sawiin ZPM Leader chuan, "Kan policy leh innghahna hi he ram hian a dampui dawn a ni," a ti a, innghahna tlâk eizawnna ngaihtuah a ngaih thu a sawi.

Lalduhoma chuan, thlai zawng zawng a man (rate) bituk sa siamin an lei thei dawn lo tih sawiin, "Item paliah kan insawrbing phawt dawn a, chungte chu sawhthing, aieng, hmarcha leh hmunphiah te rate awmsa vekin kan inchìntir ang a, kan leisak dawn a ni," a ti.

Mizoram sorkarin SEDP-a sum an dah cheng vbc. 750 ringawt pawh ruahmanna an siam angin hmang se Mizoramin a ṭhatpui nasat tur thu sawiin Lalduhoma chuan, "Chuvangin kan sorkar a nih chuan kut hnathawktute kan top priority an ni dawn a, kan intiam ang ngeiin kan leisak ang," a ti a, ding chhuak duhte an dinchhuah theihna tur sorkar an din dawn thu a sawi.

ZPM Leader chuan Mizoramah project hlamzuih a tam thu sawiin, "Zirchianna tel loa thil kan kalpui ṭhin avangin kan hlawhchham ṭhin. Sum tam tak a luangral a, chu chu ram mipuiten kan tuar nasa em em a ni," a ti.

ZPM party thuchhuah tarlan danin, nimina an pisa-a inkhawm an buatsaihah hian ZPM Leader chuan an party-ah mi 36 a lawm lut.