Lunglei kan ngaihsak sauh dawn - MNF President

MNF chuan nimin khan Hnam Runah chhung inkhawm an hmang a, thusawitu MNF president Zoramthanga chuan Lunglei Municipal Council (LMC) inthlanah an party chak lo mah se, Lunglei an ngaihsak sauh tur thu a sawi.

Zoramthanga chuan Serchhip bial pawh bial dangte thîk khawpin an duhsak hlauh thung nia sawiin, "Lungleia kan tlâkna hi inensan a hnekin kan ngaihsak sauh dawn. Theihtawpa Serchhip kan en zui angin, Lungleiah pawh kan ti zâwk dawn. 'MNF nge nge hnam thinlung putu' an tih theih nan," a ti.

An tlakchhiatna chu anmahni kaiharhtu a nih tur thu sawiin MNF President chuan, "Serchhipah kan experience tawh a, Tuirial by election-ah a rahchhuah kan hmu tawh. MNF chu hnam neitu kan ni," a ti a, theitawpin hma an lâk zel tur thu a sawi.

Zoramthanga chuan LMC inthlanah MNF an tlâk vek avanga an rilru a hrehawm thu sawiin, "Lunglei mipuite duhthlanna kan hria a, kan ngaihthah lo ang. Lungleiah sorkarin kan tih tur kan tih loh te, tih loh tur kan tihte avangin pawi kan ti a, an hriatthiamna kan dil a ni," a ti.

Naktuk, naktip aṭangin râl rêlin hma an la nghal dawn tih sawiin MNF President chuan, "Pathianin kum 60 chuang MNF min kaihhruai tawhnaah kan lo muthlu a nih pawhin tunah hian min kai tho a ni," a ti a, hma lam panin an hlawhtlin tur thu a sawi.

MNF President chuan Mizoram hi Pathianin ram thuthlung hmanga a kaihhruai thu sawiin, "Pu Laldenga kha lehkha thiam vang leh talent ropui a neih avanga thlan a ni lo. A thuthlung keng turin Pu Laldenga leh MNF hi a thlang mai a ni. Kan ṭhat bik vang a ni lo," a ti.

MNF thuchhuah tarlan danin, MNF President hian Aizawl East-I bial aṭangin an party-ah mi 213 a lawmlut a ni.