Mi tam takin BJP hre fuh loin dawt hmangin min bei ngat ngat a ni - MBJP President

Mizoram BJP chuan nimin khan an pisa-ah political session an hmang a, an president Vanlalhmuaka chuan mi tam takin BJP hre fuh loin dawt hmanga an beih ngat ngat thu a sawi.

Vanlalhmuaka chuan Mizoramah BJP sorkar a din theih nan theihtawp chhuahin an thawk tih sawiin, "Mahni kan inngaihtuah hmasak vang ni loin, Mizoram retheihna khur ata khaichhuah a nih theih nan BJP-ah hian kan awm mai a ni. Mi tam tak chuan BJP hrefuh loin, dawt hmangin min bei ngat ngat thung a, a pawi hle," a ti.

Mizorama political leader zingah an mimal ngaihdan chuan BJP ṭha ti lo an awm lo tih an thusawi tawhte aṭangin a hriat theih tih sawiin MBJP President chuan, "Nimahsela mipui avangin ṭha an tihte hi ṭha lo an ti ta mai ṭhin a ni," a ti a, chu'ng politician-te chu chinghne beram vun sin ang an nih thu a sawi.

Nakin lawkah chuan Mizoram mipuiin an fak hun a thleng dawn nia sawiin Vanlalhmuaka chuan, "Vawiina dawt hmanga BJP beitute erawh anmahni avanga hun reitak retheia an awm avangin an la kawk thung dawn," a ti.

Vanlalhmuaka sawi danin, Kristiante ni pawimawh Easter Sunday-ah pawh Prime Minister dang ang lo takin, Narendra Modi chu Kristian-te zingah inkhawmna neihpuiin India ram chu secular India a nih zia a lan tir. Congress hunlaia Prime Minister-ten an tih ngai loh thil a ni.

Narendra Modi chuan India ram prime minister a nihna hi ni tin a tih lan ṭhin thu sawiin MBJP President chuan, "Chuvangin, Mizoram mipuite kan harh a hun. Khua kan tlai tawh, kan tlai lutuk hmain kan ram leh hnam leh sakhua a him nan BJP sorkar Mizoramah kan neih theih nan theihtawp chhuah turin kan in sawm a ni," a ti.

Thusawitu dang BJP MLA Dr BD Chakma chuan, CADC inthlan lo awm turah BJP-in sorkar ngelnghet tak an din ngei dawn tih sawiin, "Mizoram mipuite harsatna sutkian a nih theih nan sorkar ṭha kan mamawh," a ti a, ADC mai ni lo Mizoram pum damna turin BJP sorkar lo chu party dang sorkar an awm loh thu a sawi.