SEDP phase-II kalpui dan tur sawiho

Lawngtlai District Level Socio-Economic Development Policy Committee chuan nimin khan additional DC Abraham Beirazi Khithie hoin DC conference hall-ah SEDP phase II kalpui dan tur an sawiho a; SEDP phase I-a second instalment Rs 25,000 chu Lawngtlai district-a beneficiary 4,500 hnenah pek mek a nih thu tarlan a ni.

Ṭhutkhawmah hian Lawngtlai district-a SEDP phase II atana hunbi ruahmansa zulzuia kal dan tur sawiho a ni a; Village Level SEDP Committee-te'n District Level Committee-a SEDP phase II beneficiary list an theh luh theih hun tawp bera ruahman April 30, 2023 ni mahse, CADC chhunga awmte bik tan CADC inthlan a awm dawn avangin hunbi tiam chu May 30, 2023 thleng pawh sei ni se, an ti.

SEDP phase II ṭanpuina sum hi beneficiary 60,000 hnenah instalment hnihin Rs 50,000 pek tum a ni. August 30, 2023 ral hmain instalment hnihna hi sem zawh hman vek tura ruahman a nih thu tarlan a ni.

SEDP phase 1-ah khan Lawngtlai district-ah department hrang hrang pariat hnuaiah SEDP beneficiary 4,500 an awm a, ṭanpuina first instalment Rs 25,000 ṭheuh pek tawh niin, second instalment Rs 25,000 pawh pek chhuah leh mek a ni a, beneficiary tam zawkin an dawng leh tawh tih an tarlang bawk.