Nungcha humhalhna dan thar zirho

Environment, Forests and Climate Change (EFCC) Chief Wildlife Warden leh Wildlife Trust of India ṭangkawp chuan nimin khan Chief Wildlife Warden Conference Hall-ah EFCC department-a thawktute tan Wild Life (Protection) Amendment Act, 2022 zirhona an buatsaih a, principal chief conservator of forest (PCCF) RK Singh, head of forest force (HoFF) ni bawkin a hawng.

Sorkar laipui chuan Wild Life (Protection) Amendment Act,2022 hi nungchate humhalh, venhim leh enkawlna kawnga khauh lehzuala kalpui a nih theih nan April 1, 2023 aṭanga hman ṭan turin hriattirna a tichhuak a; Wild Life (Protection) Amendment Act, 2022 hian Convention on International Trade in Endangered Species (CITES)- in ramsa a humhalh chinte a rawn tihpun bakah, ramsa hmanga sumdawnna chungchangah khuah-khirhna a siamthar a, dan hmasaa dan bawhchhetute hremna (pawisa chawi) pawh a ti sáng bawk.

Zirhona hi chief wildlife warden Lalrammawii Sailo in a kaihruai a; Wildlife Trust of India trustee & scientific advisor Rakesh K Singh chuan dan thar chungchang a sawifiah a ni.

He hunah hian Forest division tina DFO-te bakah Range Officer-te an tel a, vawiinah chhunzawma zawh a ni ang.