Political party-ten Zoram tan leh Lunglei tan Nasa takin hna an thawk tawh - LDCC President

Lunglei District Congress Committee (LDCC) chuan nimin khan an office-ah chhung inkhawm an nei a, LDCC president KL Chhawnzauva chuan Mizorama political party lo awm tawhten Mizoram tan leh Lunglei tan engmah thawk lo anga zirtirna thehdarh a nih thu sawiin, "Nasa takin hna an lo thawk tawh," a ti.

KL Chhawnzauva chuan, political party lo awm tawhte'n Zoram tan leh Lunglei tan engmah an thawk lo anga thehdarh chu ṭha lo a tih thu sawiin, "Ṭhangtharte dik lo taka hruai kawi tumna a ni. Congress party chauh ni lo, MNF leh PC party-te pawhin Mizoram tan mai ni lo, Lunglei tan nasa taka hna an lo thawh tawh vang zawka vawiin thlenga hmasawnna la hmu kan ni," a ti.

Congress sorkarin Mizoramah remna leh muanna a awm theih nana a thawh te, hun harsa leh thim ber aṭanga a chhanchhuah dante leh hmasawnna ruhrel lian tak tak a lo thawh tawhte ṭhalaite'n an hriat a ṭul tih sawiin, "Congress sorkarin kan ram tana a lo thawh tawh zawng zawngte hi a chhuanawm hle," a ti a, hmasawnna ruhrel lian tam tak an kalpui thu a sawi.