SSA zirtirtute dahnghet tura tihna High Court order sorkarin a dawng tawh; Samagra thawkte kan ngai pawimawh - Education Minister

Gauhati High Court, Aizawl Bench-in Mizoram SSA Teachers' Association (MSSTA) member-te state sorkarah dah nghet tura a tihna order chu Mizoram sorkarin a dawng tawh. Education minister Lalchhandama Ralte chuan Samagra-a thawkte Mizoram sorkarin a ngaih pawimawh thu a sawi.

Vanglaini palai zawhna chhangin Education Minister chuan, MSSTA member-te dahnghet tura tihna certified order chu Mizoram sorkarin a dawng tawh tih sawiin, "Court order hi uluk taka zirchian mek a ni," a ti. SSA zirtirtu chung­changah hian Gauhati High Court chuan March, 2023 thla laihawlah thutlukna a siam a ni.

Education Minister chuan Mizoram sorkar chuan Samagra hnuaia thawkte a ngaih pawimawh thu sawiin, "An hlawhte tihsân sak niin, an ngheh theihna tur pawh a hma aṭang tawha buaipui a ni. Zirtirtu ni kher lo, Samagra hnuaia thawk dangte pawh an ngheh theih dan tur kan ngaihtuah," a ti.

Lalchhandama Ralte chuan hna lâk a niha Samagra hnuaia thawkte an ngheh theih dan turah Education department-in ruahmanna an siam thu sawiin, "Kan ruahmanna siamte hi DPAR lamah kan thehlut tawh a, anni lamin an zirchiang mek," a ti a, Samagra hnuaia thawkte nen pawh thawhhona ṭha tak an neih thu a sawi.

Zawhna chhangin Lalchhan­dama Ralte chuan, tun din­hmunah chuan Gauhati High Court order khinlêt tumna an neih loh thu a sawi a, "An ngheh theih hi kan duhdan sa a ni hrim hrim zawk a, sorkar chuan Samagra-a thawkte a duhsak em em a ni. Sum dinhmun leh Covid-19 avangtein duh angin hmalakna a kal thei lo zawk," a ti.

Thu dawn danin, MSSTA hi SSA zirtirtute Mizoram sorkarah dah ngheh an nih theih nan kum 2018 khan Gauhati High Court-ah an zualko tawh a, High Court-in ngaihtuah zui mah se, thuremna mumal awm loin thubuai tihtawp a ni.

MSSTA chuan September 18, 2019 khan Gauhati High Court, Aizawl Bench-ah petition an thehlut nawn leh a, hun eng emaw chen ngaihtuah a nih hnuah Gauhati High Court judge Justice Nelson Sailo chuan March 17, 2023 khan thutlukna siamin, SSA hnuaia zirtirtu, MSSTA member-te chu Mizoram sorkara School Education department-a middle school leh primary school-a zirtirtu post ruakah dah nghet turin Mizoram sorkar a hriattir ta a ni.