ZMC aṭangin mi 68-in MBBS an zir chhuak

Zoram Medical College (ZMC)-a doctor (MBBS) zirlai hmasa berte result chu nimin khan a chhuak a, zirlai exam 95 zinga 68 an pass a, pass percentage hi 71.57% a ni.

ZMC-a MBBS zirlai hmasa berte hi 2018 batch an ni a, zirlai exam 95 zinga 68 an pass laiin, zirlai 27 (28.12%) an fail thung. A pumpuiah Lalrempuii Hmar chu pakhatna a ni a, pahnihna chu F Vanlalchhuanpuia niin, pathumna chu Ruth Lalrinawmi a ni.

Health minister Dr R Lalthang­liana chuan ZMC-a MBBS zirlai result chhuak chungchangah thuchah a tichhuak a, "Zoram Medical College-in chanchin lawmawm tak a nei hi Mizoram tan mellung pawimawh tak a ni. Sorkar hmasain theihtawp chhuaha bul a lo ṭan tawhnaah lawmthu ka sawi a, Medical College puitlin nan tun sorkar pawhin theihtawp a chhuah a ni," a ti.

Covid-19 hripui vanga hun harsa leh khirh tak Mizoramin a hmachhawn karah ZMC chu Dedicated Covid Hospital-ah puan a nih thu tarlangin Dr Thangtea chuan, "Hemi avang hian MBBS zirlaite pawhin harsatna tam tak an tâwk a, harsatna tam tak kara hlawhtlinna chang zirlaite ka lawmpui takzet," a ti a; tun ṭuma hlawhtling ta lote tan Mizoram University-in exam a buatsaih leh thuai dawn thu a sawi.

Health Minister chuan MBBS zirchhuak tharte'n internship an ṭan thuai theih nan sorkarin hma a lâk mek thu te, National Medical Council-te nen indawrna kalpui mek a nih thu leh nakkumah chuan doctor indaih lohna pawh engemawchen phuhruk a nih a beisei thute a tarlang bawk.