Sum tihchingpen thubuaiah Special Court-in KVI CEO hlui thiam loh a chantir
Aizawl District & Session Court-a special judge (Prevention of Corruption Act) Dr HTC Lalrinchhana chuan Mizoram KVI Board chief executive officer (CEO) hlui Lalsawmzuala chu sum tihchingpen thubuaiah thiam loh a chantir a, hremna tur chu vawiin hian a puang ang.
Kum 2010 khan PRISM chuan Anti Corruption Bureau (ACB)-ah complaint an thehlut a, ACB-ten an chhui chian hnuah Lalsawmzuala lakah hian thubuai ziahluh a ni. Lalsawmzuala hian thubuai pathum a nei a, pahnihah thiam loh chantir niin, pakhatah chuan thiam chantir a ni thung.
KVI CEO hlui Lalsawm-zuala hi Mizoram KVI hnena Ministry of Agriculture-in khuai khàwi tih hmasawnna atana cheng nuai 86.63 a pek te, sorkar laipuiin Food Processing Training Centre atana cheng nuai 7.50 a pek leh, Saitual khua leh a chhehvela fú chingtu chhungkaw 497-te loan rulhna atana cheng nuai 147 a ruahmante hmang khaw loa puh a ni.
Loan rulhna tihchingpen thubuai
Court thutluknaa tarlan a nih dan chuan, Lalsawmzuala hian Saitual khua leh a chhehvela fú chingtute loan rulhna tur atana margin money an ruahman sak aṭanga pawisa bang cheng nuai 9.08,369 chu mamawh ṭul ṭul atan an pawhpen a pha lo. Thuhretute thusawi aṭanga a lan danin, KVI
Board thutlukna la loin maruti van an lei bakah zanriah kilhona senso ilo atan te hman a ni.
Hemi atan hian Lalsawmzuala hian CEO a nih angin bill lem leh lehkha ṭul dang lem a siam tir ṭeuh a ni. Hetiang a nih avang hian he thubuaiah hian Lalsawmzuala hi Court chuan thiam loh a chantir.
Khuai khàwi ṭanpuina thubuai
Court thutlukna a tarlan a nih danin, heta pawisa hman ralna atan hian bill lem tam tak siam a ni tih hmuhchhuah a nih bakah, khaw hrang hranga ṭanpuina dawng anga tarlante pawh an khawtlang hruaitu hrang hrangte'n thuhretu an nih anga an sawi angin an veng leh khuaah ṭanpuina dawng anga tarlan hmingte chu an awm loh thu fiah takin an sawi.
Mizoram KVI-a thawk pahnih chuan training pea zin chhuak ang leh an office-a bill la anga tarlannate chu a dik lo tih Court an hrilh.
Hengte avang hian Lalsawmzuala chu Court-in he thubuaiah hian thiam loh a chantir a ni.
Food Processing Training Centre thubuai
Kum 2008-ah Ministry of Food Processing In-dustry, New Delhi aṭanga ṭanpuina sum cheng nuai 7.5 Mizoram KVI-in a dawnah Lalsawmzuala hi Rs 88,950 ti chingpenah puh a ni.
Court chuan thuhretu hrang hrangte thusawi aṭangin Lalsawmzuala'n a hman khaw loh leh eiruk-na hi finfiahna a awm loah ngaiin thiam a chantir.