Mizoram Health Policy neih rêl
Health & Family Welfare Board chu nimin khan an chairman Dr R Lalthangliana, Health minister hoin Secretariat conference hall-ah an ṭhukhawm a, Mizoram Health Policy mumal leh felfai tak nei tura hmalak an rêl.
Health Minister chuan, National Health Policy awm tho mah se, Indian Constitution-a 7th Schedule-ah 'Public health and sanitation; hospitals and dispensaries' chu state sorkar thuneihnaa dah a nih thu sawiin, "National Health Policy kalh si loin, Mizorama kan hriselna dinhmun leh hmabak thlir chungin target/goal neia hriselna lama kan thlen chin tur leh kalphung tur mumal taka ruahman a pawimawh. Hemi atana pawimawh tak Mizoram Health Policy tihlawhtling tur hian a chak thei ang bera hmalak a ni ang," a ti.
Bungrua leh hmanraw man to tak tak hman ṭangkai hleih theih si lohte a awm theih thu sawiin R Lalthangliana chuan, "Bungrua lei dawnin engkim ngaihtuah lâwk a, a dahna hmun turte thlengin ngaihtuah lâwk a pawimawh. A dahna tur hmun neih loh vanga bungraw man to leh ṭangkai tak tur pawh hman ṭangkai theih lohin a awm palh thei," a ti a; bungrua leh hmanraw leiah department-te mumal leh fimkhur zawka an kal a ṭul thu a sawi.
Board vice chairman Dr ZR Thiamsanga chuan, Mizoram hmasawnna turin mipui an hrisel a pawimawh tih sawiin, "Health department pawh thuam chak a ṭul a, a bikin thingtlang hriselna ngaih pawimawh a ṭul. Thingtlang mite dinhmun hi a hmuna kal tan lo chuan hriatthiam a har thei a, inhliam leh dam lohna tenauah ringawt pawh khaw danga inentir tura kal a ngai ṭhinte hi an lainatawm a, khaw tinah health centre din thei ila, tih hi kan duhthusam a ni," a ti.
Meeting chuan, Health department hnuaia hmanrua leh bungrua, thawktu mihring zawng zawngte dinhmun leh awm zat, hna thawhna hmun leh thil pawimawh dangte mumal taka chhinchhiahna tur Inventory Management System neih ṭul an ti a; awlsam taka bungrua, hmanrua leh thil pawimawh dangte enfel zung zung a nih theih nan database software inventory rang taka neih an rêl a ni. Directorate of Health Services building sak mek chungchangah, kum 2014-a sorkar laipuiin Infant Mortality Rate tihhniam kawnga Mizoramin a tih ṭhat vanga lawmpuina sum a pek hmanga sak a ni a, a tirah cheng nuai 650 ruahman a ni. In sak zawhna turin sum mamawh belh a nih vangin, SEDP aṭanga sak zawhna tur sum hmuh a nih theih nan a ṭul anga hmalak an rêl.
Meeting-a tarlan danin, Health department-ah post ruak 782 a awm mek a, chungte - MBBS 15, specialist pali, dental surgeon 11, AYUSH doctor 23, ward superintendent 30, staff nurse 161, community health officer 32, health supervisior 94, health worker 236, laboratory technician 44, x-ray technician 15 leh group-D 117 a ni.