HPC Vice Chairman-in LMC councillor-te kawng engkima thawhpui atan a sawm

Lunglei High Powered Commi­ttee vice chairman Lawmawma Tochhawng, MLA chuan nimin khan HPC conference hall-ah Lunglei Municipal Council-a coun­cillor tharte hnenah lawmpuina a hlan a, councillor tharte chu thawh­hona ṭha tak nen kawng engkima hmalakpuiah a sawm nghal.

Lawmawma Tochhawng chuan, Lunglei tihmasawn tura hmathlir ṭha tak an neihte an tih hlawhtlin ngei theih nan theihtawp chhuah turin a chah a, "Lunglei Municipal Council hi Lunglei district tan mellung thar pawimawh tak a nih angin LMC Board of Councillors hmasa berte mawhphurhna a sang tak zet. Mipui tana kan hnathawhna leh rawngbawlna hi Pathian rawngbawlna pawimawh tak a ni tih kan hriat nawn leh fo a ṭha," a ti.

An hma zawn ṭheuha tih tur awmte uluk leh taima taka thawk ṭhin tur leh mipui hamṭhatna dah hmasa zel tura chahin Lawmawma chuan, "Ram leh hnamin hmasawnna a neih tawh hrang hrangah politician-te contribution tam tak a awm," a ti a, ram hruaitu hmasa leh hruaitu ni mekte hnathawh leh sulhnu hlu tak takte mipuite'n an hlut thiam a ṭul thu a sawi.

He hunah hian Lunglei bawrhsap Ramdinliani, SP Rahul Alwal, Lunglei Sub-Hqsr YMA hruaitu te, media aiawhte leh mi pawimawh dangte an tel a; Lunglei tana hmalak dan turte an sawiho nghal a ni.