KHAWTHLIR

KTP-in thisen pe

KṬP, Airfield Vengthar Pastor chuan nimin khan Synod Hospital blood bank tan thisen unit 27 an pe a, petute mipa 23 leh hmeichhia pali an ni.

Heroin man

Mizoram Police hnuaia CID (Special Branch) chuan nimin zing khan Hnahlan khaw daiah Ginsuanlang (34) s/o Nangsianpau Sakawrlam, Tiddim, Myanmar hnen aṭangin heroin kg 1.117 (hawng 100) an man a; international market-ah cheng nuai 558.5 man a ni. Ruihhlo leh a neitu hi Champhai Police Station-ah dan anga hmalak zui turin an hlan nghal.

BIS inhrilhfiah

Lunglei DC office leh Bureau of Indian Standards, Guwahati ṭangkawp chuan nimin khan Lunglei Convention Centre-ah Bureau of Indian Standards (BIS) chungchang inhrilhfiahna, awareness program an buatsaih. Lunglei district-a sorkar hotute, tlawmngaipawl, MJA, Lunglei District Consumer Association, Southern Market Association, Lunglei Market Association, Lunglei College leh J Buana College-a consumer Club member-te an tel.

Duhoma lawmpui

ZPM ṭhalai chuan thuchhuah siamin, ICFAI University-in kum 2018-2023 chunga MLA ṭha ber (Best Legislator Award) atana an thlan ZPM leader Lalduhoma chu an lawmpui thu tarlangin, "Ram leh hnam tâna a rawngbawlna kawngah hriselna ṭha zawk leh finna neih belh a, huaisen taka ke a pen zel theihna turin duhsakna sáng ber kan hlan a ni," an ti.

NIPUN Bharat

Kum 2026-2027 ralhmaa primary school zirlaite'n Foundation Literacy & Numeracy (chhiar, ziak leh chhiarkawp) an thiam theihna tura sorkar laipuiin ruahmanna a duan, NIPUN Bharat chu nimin khan Khawzawl district-a kalpui turin DC CC Lalchhuangkima'n a hawng. Khawzawl district-a NIPUN Bharat kalpui turah hian District Mission din fel a ni tawh a; DC chu convener niin, DEO/DPC Samagra Shiksha chu co-convener a ni a, Dy. DPC chu Member Secretary a ni. Member atan mi pariat ruat an ni bawk.