Hmarchhakah inkalpawhna kawngpui hmasawnna atan sum tam tham tak sèn a ni tawh - Union MoS

Union Development of North Eastern Region (DoNER) & Cooperation minister of state BL Verma chuan nimin khan Mamit khawpui a tlawh. MoS chuan, hmarchhakah inkalpawhna kawngpuite tih hmasawn nan sum tam tham tak sèn tawh niin, sèn belh zel tura hmalak mek a nih thu a sawi.

Mamit DC conference hall-a sorkar hotute nen aspirational district hnuaia hmalakna hrang hrang an thlirlêtnaah Union minister of state BL Verma chuan, Delta Ranking-ah Mamit district-a hmasawnna hmuh tur a awm chu lawmawm a tih thu sawiin, ṭan la zel turin a chah a, "Hmarchhaka inkalpawhna kawngpui tihhmasawn nan sum tam tham tak sèn tawh niin, sèn belh zel tura hmalak mek a ni. Sorkar laipui chuan hmarchhak tan theihtawp a chhuah zel," a ti.

BL Verma chuan tunhmaa inkalpawhna kawnga harsatna awm ṭhinte sutkian mek zel a nih thu a sawi a, "Ministry hrang hrang hotute leh hmarchhaka Chief Minister-te thawhhona zarah chak taka hmasawnna kalpui mek zel a ni. Mamit district-in hmasawnna rahbi a neih theih nan cooperative societies-te thâ tichak turin ka enkawl Ministry chuan theihtawp an chhuah a ni," a ti a, harsatna an neihte a hnena thlen hreh lo turin a chah.

Farmers Society hrang hrangte'n an harsatna hrang hrang an thlenah Union Minister chuan a theih ang anga lo enzui a, hmalakpui a tum thu leh an harsatnate ziaka thehlut turin a hrilh.

Ṭhutkhawmah hian SDC Henry Malsawmtluanga, Aspirational District Programme nodal officer ni bawk chuan sorkar hmalakna leh Delta Ranking dinhmunte a sawifiah a ni.

Union MoS hi DONER Deputy Secretary in a ṭawiawm a, inkawmhonaah hian Mamit khawpuia department hrang hrang hotu te, tlawmngaipawl aiawh leh khawtlang hruaitute bakah, thuthar thehdarhtute an tel.