Education dept. leh Rotary-in MoU an ziak

School Education department leh Rotary India Literacy Mission chuan nimin khan School Education secretary Dr Lalzirmawia Chhangte pisaah television (TV) kaltlanga naupangte zirtirna pek chhuah kawnga thawhdunna tur inremna, memorandum of understanding (MoU) an ziak.

Sorkar thuchhuah tarlan danin, sorkar laipuia Ministry of Education chu state tinte'n zirna (education) atan bika a thlawna an hman tur TV channel pe turin a in ruahman mek. Hei hi zirlai tin te, hmun kilkhawr bera awmte leh zirtirtu awm mumal lohna hmuna zirlai awmte pawhin zirna ṭha an dawn theihna atana ruahman a ni.

He ruahmanna hi PM eVIDYA DTH TV Channel tih niin, Mizorama School Education department pawh TV channel hi enkawl tura tih a ni a; BISAG, Gujarat aṭangin TV programme hi an rawn chhuah ṭhin dawn a ni.

PM eVIDYA programme atan hian SCERT, Mizoram chu State Coordinating Agency atan ruat a ni bawk.