Minister-in DTO building thar a hawng

Transport minister J Lalnuntluanga chuan nimin khan Serchhip Darnam Vengah District Transport Office (DTO) building thar a hawng. DTO building hi SEDP sum cheng nuai 240 senga sak a ni a, contractor chu CB Engineers a ni.

TJ Lalnuntluanga chuan, Mizoramah social media vela thil sawisel thiam an tam thu a sawi a, "A siam ṭhatu leh tih dan dik kawhhmuh theitu erawh kan tlem hle niin ka hria. Mi tinte'n thil ṭha leh ṭangkai ngaihven a, ngaihhlut tur dik kan ngaihhlut thiam zel a ṭul," a ti.

Tunhma chuan Aizawlah lirthei register turin an kal ṭhin tih sawiin Minister chuan, "Hun engemawchen aṭang khan Serchhipin DTO kan nei ta a, mipuite'n kan awlsam phahin kan ṭangkaipui em em a, vawiinah phei chuan a hmunhma pawh changtlung lehzual, lirthei tam tham tak dah theihna kan nei leh ta. A hmunhma min petu Darnam khawtlangte chungah lawmthu kan sawi a, a sak chhunga Darnam VC-te'n min puih nasatziate kan hrereng a, kan lawm hle," a ti a, contractor pawhin a thawk ṭha hle nia a hriat thu a sawi.

Minister chuan ram economy chu transport sector-ah a innghat thuk avangin sorkar pawhin nasa takin a thuam ṭha chho zel niin a sawi a, "Lirthei neitute leh khalh ṭhinte'n dan ang taka kan lirtheite kan enkawl a pawimawh a, dan hian kan himna tur min pein min kawhhmuh tih hrereng ang u," a ti bawk.

DTO building thar hawnna inkhawm hi Transport secretary KT Beicho-a'n a kaihruai a, director R Lalrammawia'n report a pe a ni.