Farkawn khaw khelmuala phullem phah thar hawn a ni; Sorkarin infiamna chàwi sàn zel a tum - Ramthanmawia

East Tuipui bialtu MLA Ramthanmawia chuan nimin khan a bial chhunga Farkawn public playground-a phullem (astro/ synthetic football turf) phah thar a hawng. MLA chuan, "Nakin zela ram leh hnam innghahna tur ṭhalaite ruihhlo laka chhanchhuah nan sorkarin infiamna chàwi sàn zel a tum," a ti.

Ramthanmawia chuan hripui leng avanga harsatna hrang hrang karah sorkarin hmasawnna ruhrel pawimawhte ngaipawimawhin a siam chho zel tih a sawi a, "Infiamna kawnga ṭhalaite tuihalna sutkian nan football mai ni lo, sports discipline dangahte pawh hmasawnna ruhrel siam chhoh zel tum a ni a, nakin zela ram leh hnam innghahna tur ṭhalaite ruihhlo laka chhanchhuah nan sorkarin infiamna chàwi sàn zel a tum," a ti a, Tuipuiral mipuite chu Zonun zemawi chhawmnungtu leh inlungrual tak an nih thu a sawi.

Khualzahawm John Ṭanpuia, Mizoram State Sports Council (MSSC) secretary pawhin thu sawiin, sorkar laipui scheme-te uluk taka zirchiangin rawtnate siama sports infrastructure din chhoh mek zel a nih thu a sawi. Phullem phah thar leh Tuipuiral Games & Sports Association Golden Jubilee lawmpui nan MSSC hmingin Rs 1,00,000 a hlan nghal.

Farkawn Public Playground-a phullem phah hna hi Special Assistance to States for Capital Expenditure (SASCE) scheme sum cheng nuai 450 sengin M/s Mizoram Development Agency, Aizawl leh Decor India, Guwahati-te'n an thawk a; phullem hi a dung metre 100 leh a vang metre 66 niin, inkhelhna tur bik chu a dung metre 94 leh a vang metre 63 a ni.

Phullem phahna atan hian 'New Technology Drain Board System' hman niin, a sir kil hnihah tui paihna siam a ni a, artificial grass hi ACT Global Company, USA siam a ni.