Phone bo block dan duang chhuak

Sorkar laipui chuan mobile phone rûkbo emaw tihbo emawte a neitute'n an hmuhlêt theih nan chhuizui theihna leh a bo chhunga phone bo hman theih loha siam (block) dan a duangchhuak a; phone block tir dawn hian a block tirtu hriat theihna (identity proof) mumal tak thehluh a ngaih avangin uan nan leh mi dang pawikhawih nan hmang lo turin sorkar chuan mi tin a ngen.

Sorkar thuchhuah tarlan danin, tunlai hian mobile phone rûkbo leh tihbo palh report bakah, secondhand mobile phone zawrh ṭhin zingah rukbo sa zawrh a tam hle a, mobile phone leitute'n phone rûk zawrh an lei loh nan sorkar laipuiin phone lei tur chu a him leh him loh hriat theihna tur a siam bawk a ni.

PHONE BO BLOCK CHUNGCHANG
■ Phone rûkbo/ tihbona hmun bialtu Police Station-ah FIR thehluh ngei tur a ni.

■ FIR-ah hian a bo dan, a bona hmun leh hun leh, mobile phone chungchang kimchang taka ziah tur.

■ FIR-ah hian phone bo chu block nghal tura dilna ziah tel nghal theih a ni a, police-te'n an bawhzui tawh ang.

■ Mahni pawhin phone bo hi block tir theih a ni a; Police Station-a FIR thehluh hnuah www.ceir.gov.in ah lutin block tir tur a ni.

■ Phone bo hi hmuhlet a nih hnuah www.ceir.gov.in ah tho hian unblock leh tur a ni.

■ Phone block tir dawn hian a block tirtu identity proof thehluh a ngai

■ Uan nan leh mi dang pawikhawih nana hmangte chungah dan anga action lak a ni ang.

SECONDHAND MOBILE PHONE CHUNGCHANG
■ Know Your Mobile (KYM) hmangin kawng thumin secondhand phone zawrh lai chu rûk a nih leh nih loh a en theih.

■ 14422-ah SMS hmangin KYM (space) (phone zawrh lai IMEI number) chhutluha thawn tur.

■ KYM App hmangin a en theih a, hei hi play store leh app store aṭanga download theih a ni.

■ www.ceir.gov.in aṭangin a en theih bawk.

■ KYM aṭanga secondhand mobile phone him tia hriattirna dawnte chauh lei tur.

■ Secondhand mobile phone zawrh lai chu rûk a nih chuan police-ah hriattir nghal vat tur.

■ A theih phei chuan phone leh a zuartu chu manin police-ah pek tur a ni.