ASF vangin khuahkhirhna tichhuak

Aizawl bawrhsap Dr Lalhriatzuali Ralte chuan April 5, 2023 khan vawk pùl hri, African Swine Fever (ASF) chungchangah khuahkhirhna a tichhuak a; AH & Vety Director hnen aṭanga phalna neite tan ASF hri lên lohna state aṭangin vawksa aṭanga thil siam (frozen pork) lakluh phal a nih thu a tarlang.

Bawrhsap chuan, Aizawl district-ah Mizoram pawna ASF hri lênna aṭangin vawk, vawksa leh vawksa aṭanga siam eitur lakluh khap a nih thu a tarlang a, "District leh district inkarah vawk leh vawksa lakluha lakchhuah phal a ni lo. Vawk damlo reng reng talh leh hralh khap tlat a ni a, vawk damlo chu dan hran vat tur a ni. Vawk thi reng reng thuk taka phum bo tur," a ti.

Vawk damlo leh thi an awmin AH&Vety department hotute hnenah hriattir vat tur leh vawk suat duhte'n Vety department-ah dilna thehluh tur a nih thu tarlangin Aizawl Bawrhsap chuan, "AH&Vety Director hnen aṭanga phalna neite tan ASF hri lên lohna state aṭangin vawksa aṭanga thil siam (frozen pork) lakluh phal a ni. Amaherawhchu, Standard Operating Procedure zawm ngei tur a ni a, APEDA in a pawmpui firm an ni bawk tur a ni," a ti a; thupek hi thla hnih chhung atan hman tur niin, thupek zawm lote chu IPC Section 188 hmanga hrem theih an nih thu a tarlang bawk.