Swab sample 21,955 endik tawh Endik zinga 2.30%-in hripui an vei
Covid-19 vei leh vei loh hre turin Mizoram aṭangin August 4, Thawhlehni thleng khan swab sample 21,955 endik a ni tawh a, chu'ng aṭang chuan mi 504-in hripui an vei tih hmuh chhuah a ni a, chu chu endik tawh zat aṭangin 2.30% a tling.
Mizoram aṭanga swab sample endikna hmasa ber (February 2020-ah) National Institute of Cholera and Enteric Diseases (NICED), Kolkata-ah mi panga endik a nih hnuah Guwahati Medical College-ah mi 12 endik leh a ni a, GMC-ah hian Mizorama hripui vei hmasa ber chu March 24-ah hmuh chhuah a ni. Silchar Medical College-ah swab sample 41 endik leh a ni a, April 7 aṭangin Zoram Medical College laboratory-ah RT-PCR hmangin swab sample test tih
ṭan niin, sample 20,131 endik a ni tawh. Lunglei Civil Hospital (LCH) laboratory-ah Truenet-PCR hmangin sample 1,165 leh Rapid Antigen Test hmangin district hrang hrangah sample 601 endik a ni tawh bawk.
GMC-ah Covid-19 vei mi pakhat hmuh chhuah a nih aṭanga thla hnih chuang hnu, June 1-ah ZMC-ah hripui vei hmuh ṭan a ni a, August 4 thleng khan mi 438 (2.18%) hmuh chhuah a ni tawh. LCH laboratory-ah mi 45 (3.86%) leh Rapid Antigen Test hmangin district hrang hrangah mi 20 (3.33%) hmuh chhuah tawh a ni. Hetih lai hian, state ramria luhka hrang hranga medical screening point-ah mi 1,49,534 enfiah (screen) a ni tawh bawk.
Sample test leh Covid-19 positive
(August 4, 2020 thleng)
Endikna hmun Endik Covid-19
tawh zat Vei zat
NICED, Kolkata 5 0
Guwahati Medical College 12 1
Silchar Medical College 41 0
ZMC Lab. RT-PCR 20,131 438
Lunglei Civil Hospital Lab. 1,165 45
Rapid Antigen Test 601 20