Mizoramah eirûkna a reh theih nan YMA-in chak zawka hmalak an rèl

YMA Central Coordination Committee (CCC) nimina Central YMA Hall-a ṭhukhawm chuan, Mizorama eirûkna leh hlemhlêtna a reh theih nan YMA sub-headquarters, group leh branch chhungah chak zawka hmalak an rèl bakah, kut tling loa sum la lut leh thawh chhuah phú loa khawsate endawng thiam an duh thu an puang.

YMA-a rorelna sang ber dawttu CCC hian YMA Rorel Inkhawm vawi thumna, October 27, 2022-a Thingsulthliah khel-muala neiha rorelte bawhzui dan an thlir a, CYMA president R Lalngheta'n a kaihruai. "Eirûkna leh hlemhlêtna a reh theih nan Central YMA-in tun aia chak zawkin hma la rawh se” tia an rêl tawh chungchangah resolution an siam a ni.

YMA CCC resolution chuan, "Mizoram chhunga eirûkna leh hlemhlêtna a reh theih nan sub-hqrs./ group/ branch YMA ten kan huam chhungah chak zawka hmalak zui zel ni se. Kut tling loa sum la lut leh thawh chhuah phû loa khawsate endawng thiam ni se," a ti.

Eirûkna leh hlemhlêtna chungchanga court rorelna leh corruption buaipuitu Special Judge thuremna lawmawm an tih thu te, ram leh hnam tana hnathawhnaah court leh special judge-te YMA-in an thlàwp tlat zel dawn thute resolution chuan a tarlang bawk.

"Eirûkna leh hlemhlêtna a reh theih nan CYMA-in hma la rawh se," tih an lo rèl tawh bawhzuia hma la turin YMA chuan committee a din tawh a ni.

CCC ṭhutkhawmah hian, 'Mizoram chhunga hnam dang hnena in hmun/ huan/ lo/ ram lei leh hralh/ hlan chhâwn zel a nih loh nan Mizoram chhunga in hmun/ huan/ lo/ram hralh leh hla chhâwn a nih dawn reng rengin YMA hriatpuina telh zel a nih theih nan CYMA-in hma la rawh se,' tih chu chak taka hmalak zui zel ni se, tiin an rêl a; CYMA-in sorkarah RTI Act hmangin Mizorama hmun leh hmate hnam dangin an neih tawh dan zawh chian ni se, kan dan hman lai Revenue Act, 2013 chiang zawka zir ni se, an ti.

Mizoramin market regulations a neih chu a taka hman a nih theih nana hmalak te, Mizoram hmun hrang hranga sorkar damdawi-inte hmanraw ṭha zawk leh thawktu tam zawkin thuam ṭha rawh se tihte leh, Mizorama vocational course zirna uar zawka kalpui dan turte an rél.

Ráltlânte chung-changah, hmun hrang hranga an awm darh lutuk chuan harsatna lian zawk a la thlen thei dawna a lan avangin sorkarin relief camp changtlung zawk siam tur leh chumiah chuan dah vek tura sorkar lama chak zawka hma la turin Mizoram sorkar nawr chhunzawm zel an rél a; CYMA-in theka rate a siam chu hman a nih theih nan Aizawl khawpui chhungah hmalak zel bakah, sub-headquarters-te pawhin an huam chhungah ṭheuh an hman turin lo zir chiang ve thuai se, tiin an rél bawk.

YMA CCC-ah hian CYMA hruaitute bakah, sub-headquarter office bearer te, YMA group aiawh mi pahnih zel leh Aizawla branch aiawh mi pakhat zel an tel thei a; nimina ṭhutkhawmah hian mi 224 an tel a ni.