ZMC result-ah Congress an lawm

Mizoram Pradesh Cong­ress Committee (MPCC) office bearer-te nimina Congress Bhavan-a ṭhukhawm chuan resolution an siam a, Zoram Medical College (ZMC)-in MBBS first batch result ṭha tak a neih avangin lawmawm an tih thu an tarlang.

MPCC office bearer-te chuan, Congress sorkarin harsatna tam tak paltlangin kum 2018-ah medical college, Mizoram Institute of Medical Education and Reasearch (MIMER) a din tih tarlangin, "MNF sorkarin ZMC tia hming a thlâk tâkin MBBS first batch result ṭha tak a nei ta hi a lawmawm kan ti," an ti.

Doctor zirlai hmasa ber mi 95 zinga pass ta zirlai 68 (71.57%)-te leh thawktu zawng zawng an lawmpui tak zet thu an tarlan rualin, hlawhtling ve ta rih lote pawh hlawhtling zui ngei turin duhsakna an hlân a ni.

MIMER (ZMC) din laia Health minister Lal Than­zara pawhin press statement a tichhuak a, "Mizoramin medi­cal college a neih chhunin MBBS result hmasa ber ṭha tak a nei hi Mizoram tan hmasawnna ropui tak, hriat reng tlâk ni-ah ka ngai. Medical college a hlawh­tlinna atana thâ thawhtu zawng zawng, chief minister hlui Pu Lal Thanhawla leh sum mamawh engkim ngaih­tuahtu, a hun laia Finance minister Pu Lalsawta leh hotu dang te, official zawng zawngte ka chhuang tak zet a ni," tiin a tarlang.