Sum tihchingpen vangin KVI CEO hlui Court-in Rs 4,00,000 chawi turin a hrem

Aizawl District & Session Court-a special judge (Prevention of Corruption Act) Dr HTC Lalrinchhana chuan Mizoram KVI Board chief executive officer (CEO) a nih laia sum a tihchingpen vanga thiam loh a chantir Lalsawmzuala chu Rs 4,00,000 chawi turin a hrem a, táng turin a ti lo thung.

Special Judge (PC Act) hian Lalsawmzuala hi a thubuaiah April 11, Thawhlehni khan thiam loh a lo chantir tawh a, nimin khan hremna a puang a ni.

Lalsawmzuala hi thiam loh chantir a nih ní, Thawhlehni khan jail-ah dah nghal a ni a; Court chuan chumi bak chu tàn belhtir ṭul a ti lo a, Rs 4,00,000 cháwi turin a hrem a ni. Pawisa a pe lo a nih chuan kum hnih chhung táng turin a ti thung.

KVI CEO hlui Lalsawmzuala hi Saitual khua leh a chhehvela fu chíngtute loan rulhna tur margin money ruahman aṭanga pawisa bâng Rs 9,08,369 tihchingpen leh khuai khàwi tihhmasawnna tur sum cheng nuai 86.63 tihchingpen thubuaiah thiam loh chantir a ni.

Lalsawmzuala hrem nat loh chhante
1. Ama mimal tan pawisa chingpen a kawl emaw, a nei tih finfiahna a awm lo.

2. Kum upa tawh tak, hriselna ṭha tawh lo a ni a, jail-ah rei tak dah chi a ni tawh lo.

3. A hmain criminal case-ah thiam loh chantir a la ni ngai lo.