MNF ṭhalaite'n kil hrang hrang aṭanga Robert Romawia beih tumah ZPM an puh

Mizo National Youth Front (MNYF) hruaitute chuan nimin khan Aizawl Press Club-ah thuthar thehdarhtute an kâwm a; kil hrang hrang aṭanga Sports & Youth Services minister Robert Romawia beih tumah ZPM party an puh.

MNYF vice president Zodinpuia chuan, Covid-19 léngin kum hnih chuang Mizoram a tibuai chungin chief minister Zoramthanga leh SYS minister Robert Romawia Royte te hmalakna avangin infiamna ruhrel din kawngah Mizoramin hmasawnna tam tak a nei thar niin a sawi a, "MNF Ṭhalai chuan lawmawm kan ti hle a ni," a ti.

Robert Romawia chu Mizo ṭhalai leh infiammite hmasawnna tura nasa taka thawktu nia sawiin Zodinpuia chuan, "ZPM party hian hmu thei loin kil hrang hrang aṭanga beihna tur an dap reng a ni," a ti a, social media-ah ṭawngkam chhe tinrêngin an chirhtheh niin a sawi.

MNYF Vice President chuan, ZPM-te'n thu awmze nei lo hmangin Governor-ah Robert Romawia an hêk nia sawiin, "Naktukah pawh Election Commission of India-in an beisei ang thutlukna a siam dawn lo tih hre lâwk ang hrimin mipui rilru hruai kâwi nan punkhawm buatsaih an tumte hi zahthlak hleah kan ngai," a ti.

MNYF hruaitute chuan, Assembly House-ah thu dik lo sawi vanga ZPM leader Lalduhoma’n ngaihdam a dil tuk aṭangin ZPM-in kawng hrang hrangin Robert Romawia beihna tur an dap a, mahse, dan hre mite'n an zir chianna aṭangin Robert Romawia'n dan a bawhchhe lo niin an sawi.

ZPM party-in politics-a mipui rilru hruai kâwi nan thu dik lo an vawrh kual tih mipuiin lo hria se an duh thu sawiin MNYF hruaitute chuan, "Robert Romawia Royte hi kan chhuang a, a thâ tichak turin kawng hrang hrangin kan thláwp zel dawn a ni," an ti.

MNYF hruaitute chuan, ZPM a din hnuah dâwta inchirhthehna Mizoram politics-ah a lâr thar nia sawiin, chu chuan Mizo khawtlang nun nuam tak tichhiaiin, kohhran leh chhungkaw inrêlbàwlna thlengin nghawng ṭha lo a neih a hlauhawm thu an sawi bawk.